ടറോബ: ഉഗാണ്ടക്കെതിരായ ടി20 പോരാട്ടത്തില്‍ ന്യൂസിലന്‍ഡിനു അനായാസ ജയം. 9 വിക്കറ്റിനാണ് കിവികള്‍ ജയം പിടിച്ചത്. ഉഗാണ്ടയുടെ പോരാട്ടം 18.4 ഓവറില്‍ വെറും 40 റണ്‍സില്‍ അവസാനിപ്പിച്ച കിവികള്‍ 5.2 ഓവറില്‍ ഒരു വിക്കറ്റ് നഷ്ടത്തില്‍ 41 റണ്‍സെടുത്താണ് ജയം തൊട്ടത്.
സൂപ്പര്‍ എട്ട് കാണാതെ ന്യൂസിലന്‍ഡ് നേരത്തെ തന്നെ പുറത്തായിരുന്നു. ഈ ലോകകപ്പിലെ ആദ്യ ജയമാണ് ന്യൂസിലന്‍ഡ് സ്വന്തമാക്കിയത്. വെസ്റ്റ് ഇന്‍ഡീസിനോടും അഫ്ഗാനിസ്ഥാനോടും തോറ്റതാണ് കിവീസിനു തിരിച്ചടിയായത്.
നാലോവറില്‍ വെറും നാല് റണ്‍സ് മാത്രം വഴങ്ങി മൂന്ന് വിക്കറ്റെടുത്ത ടിം സൗത്തിയാണ് ഉഗാണ്ടയെ തകര്‍ത്തത്. ട്രെന്റ് ബോള്‍ട്ട് നാലോവറില്‍ ഏഴ് റണ്‍സ് മാത്രം വഴങ്ങി രണ്ട് വിക്കറ്റുകള്‍ നേടി. മിച്ചല്‍ സാന്റ്‌നറും രചിന്‍ രവീന്ദ്രയും രണ്ട് വിക്കറ്റുകള്‍ തന്നെ വീഴ്ത്തി. ലോക്കി ഫെര്‍ഗൂസന്‍ ഒരു വിക്കറ്റെടുത്തു.
പന്തെറിഞ്ഞ അഞ്ച് ബൗളര്‍മാരും വിക്കറ്റുകള്‍ വീഴ്ത്തി. പത്തിലധികം റണ്‍സ് ഒരു താരവും നല്‍കിയതുമില്ല.
ഉഗാണ്ട നിരയില്‍ ഒരൊറ്റ താരമാണ് രണ്ടക്കം കടന്നത്. 11 റണ്‍സെടുത്ത കെന്നത് വൈസ്വയാണ് ടോപ് സ്‌കോറര്‍. നാല് താരങ്ങള്‍ പൂജ്യത്തില്‍ പുറത്തായി. നാലില്‍ മൂന്ന് പേരും ഗോള്‍ഡന്‍ ഡക്ക്.
മറുപടി പറയാന്‍ ഇറങ്ങിയ കിവികള്‍ക്ക് ഓപ്പണര്‍ ഫിന്‍ അല്ലന്റെ വിക്കറ്റ് മാത്രമാണ് നഷ്ടമായത്. താരം 9 റണ്‍സെടുത്തു. 22 റണ്‍സെടുത്ത ഡെവോണ്‍ കോണ്‍വെയും ഒരു റണ്ണുമായി രചിന്‍ രവീന്ദ്രയും പുറത്താകാതെ നിന്നു.
വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates