ന്യൂഡല്‍ഹി: ശ്രീലങ്കക്കെതിരായ ഇന്ത്യയുടെ വൈറ്റ്‌ബോള്‍ പരമ്പര ജൂലൈ 18ന് ആരംഭിക്കും. ബിസിസിഐ സെക്രട്ടറി ജയ് ഷായാണ് ഇക്കാര്യം അറിയിച്ചത്. 

ജൂലൈ 13നാണ് ഏകദിന പരമ്പര ആരംഭിക്കേണ്ടിയിരുന്നത്. എന്നാല്‍ ലങ്കന്‍ ക്യാമ്പില്‍ കോവിഡ് കേസുകള്‍ റിപ്പോര്‍ട്ട് ചെയ്തതോടെ പരമ്പര നീട്ടിവെക്കുകയാണ്. ശ്രീലങ്കയുടെ ബാറ്റിങ് കോച്ച് ഗ്രാന്റ് ഫഌവര്‍ ഉള്‍പ്പെടെ മൂന്ന് പേര്‍ക്കാണ് കോവിഡ് സ്ഥിരീകരിച്ചത്. 

കോവിഡിന്റെ ഡെല്‍റ്റ വകഭേദമാണ് മൂന്ന് പേരിലും കണ്ടെത്തിയത്. ഇംഗ്ലണ്ടിനെതിരായ പരമ്പരക്ക് ശേഷം കഴിഞ്ഞ തിങ്കളാഴ്ചയാണ് ശ്രീലങ്കന്‍ ടീം നാട്ടിലെത്തിയത്. കോവിഡ് കേസുകള്‍ റിപ്പോര്‍ട്ട് ചെയ്തതോടെ ലങ്കന്‍ ടീമിന്റെ ക്വാറന്റൈന്‍ ദിനങ്ങളും നീളും. 

ജൂലൈ 17ന് ആദ്യ ഏകദിനം എന്നായിരുന്നു ആദ്യം വന്ന റിപ്പോര്‍ട്ടുകള്‍. എന്നാല്‍ ജൂലൈ 18നാണ് പരമ്പര ആരംഭിക്കുന്നതെന്ന് ജയ് ഷാ വ്യക്തമാക്കി. ജൂലൈ 18,20,23 എന്നീ തിയതികളിലാവും ഏകദിന പരമ്പര നടക്കുക. ടി20 പരമ്പര ജൂലൈ 25ന് ആരംഭിക്കും.