മുംബൈ: ഒക്ടോബർ- നവംബർ മാസങ്ങളിലായി ഇന്ത്യ ആതിഥേയത്വം വഹിക്കുന്ന ഏകദിന ലോകകപ്പ് ക്രിക്കറ്റിന്റെ ഭാ​ഗമായുള്ള സന്നാഹ മത്സരങ്ങളുടെ വേദി പ്രഖ്യാപിച്ചു. തിരുവനന്തപുരം ​ഗ്രീൻഫീൽഡ് സ്റ്റേഡിയത്തിൽ നാല് മത്സരങ്ങൾ നടക്കും. സെപ്റ്റംബർ 29 മുതൽ ഒക്ടോബർ മൂന്ന് വരെ പത്ത് സന്നാഹ മത്സരങ്ങളാണ് അരങ്ങേറുന്നത്. തിരുവനന്തപുരം, ​ഗുവാഹത്തി, ഹൈദരാബാദ്, എന്നിവിടങ്ങളാണ് വേദികൾ. 

ഇന്ത്യയുടെ ഒരു മത്സരവും ​ഗ്രീൻഫീൽഡിൽ അരങ്ങേറും. ഒക്ടോബർ മൂന്നിനു നെതർലൻഡ്സിനെതിരെയാണ് ഇന്ത്യയുടെ ​ഗ്രീൻഫീൽഡിലെ സന്നാഹ മത്സരം. സെപ്റ്റംബർ 29ന് ദക്ഷിണാഫ്രിക്ക- അഫ്​ഗാനിസ്ഥാൻ, 30നു ഓസ്ട്രേലിയ- നെതർലൻഡ്സ്, ഒക്ടോബർ രണ്ടിന് ന്യൂസിലൻഡ്- ദക്ഷിണാഫ്രിക്ക പോരാട്ടങ്ങളാണ് ​ഗ്രീൻഫീൽഡിൽ അരങ്ങേറുന്ന മറ്റ് മൂന്ന് പോരാട്ടങ്ങൾ. 

​ഗുവാഹത്തിയിൽ ബം​ഗ്ലാദേശ്- ശ്രീലങ്ക, ഇന്ത്യ- ഇം​ഗ്ലണ്ട്, ഇം​ഗ്ലണ്ട്- ബം​ഗ്ലാ​ദേശ്, അഫ്​ഗാനിസ്ഥാൻ- ശ്രീലങ്ക മത്സരങ്ങൾ നടക്കും. ന്യൂസിലൻഡ്- പാകിസ്ഥാൻ, ഓസ്ട്രേലിയ- പാകിസ്ഥാൻ പോരാട്ടങ്ങളാണ് ഹൈദരാബാദിൽ അരങ്ങേറുന്നത്. 

ഒക്ടോബർ അഞ്ച് മുതൽ നവംബർ 19 വരെയാണ് ലോകകപ്പ് പോരാട്ടങ്ങൾ. മത്സരത്തിന്റെ ടിക്കറ്റുകൾ ബുക്ക് മൈ ഷോയിലൂടെ വിതരണം ചെയ്യുമെന്നു ബിസിസിഐ വ്യക്തമാക്കി. 

ഈ വാര്‍ത്ത കൂടി വായിക്കൂ 

പ്ര​ഗ്നാനന്ദയോ, കാൾസനോ? ഇനി ടൈബ്രേക്കർ പോര്; ചെസ് ലോക ചാമ്പ്യനെ ഇന്നറിയാം

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ