സെഞ്ചൂറിയന്‍: 2021ലും ഇന്ത്യന്‍ ടെസ്റ്റ് ക്യാപ്റ്റന്‍ വിരാട് കോഹ്‌ലിക്ക് സെഞ്ചുറിയില്ല. ഈ വര്‍ഷത്തെ ഇന്ത്യയുടെ അവസാന ടെസ്റ്റായ സെഞ്ചൂറിയനില്‍ രണ്ട് ഇന്നിങ്‌സിലും സ്‌കോര്‍ ഉയര്‍ത്താന്‍ കോഹ് ലിക്ക് കഴിഞ്ഞില്ല.
സെഞ്ചൂറിയനിലെ ആദ്യ ഇന്നിങ്‌സില്‍ 35 റണ്‍സ് എടുത്ത് കോഹ് ലി മടങ്ങി. രണ്ടാം ഇന്നിങ്‌സില്‍ 18 റണ്‍സ് മാത്രം എടുക്കാനെ ഇന്ത്യന്‍ ക്യാപ്റ്റനായുള്ളു. 2019ലാണ് അവസാനമായി കോഹ് ലി സെഞ്ചുറി നേടിയത്.
അവസാനമായി സെഞ്ചുറി നേടിയത് ഈഡന്‍ ഗാര്‍ഡനില്‍
2019 നവംബര്‍ 23ന് ബംഗ്ലാദേശിന് എതിരെ ഈഡന്‍ ഗാര്‍ഡനിലാണ് കോഹ് ലി അവസാനമായി സെഞ്ചുറി നേടിയത്. അത് കോഹ് ലിയുടെ 70ാമത്തെ രാജ്യാന്തര സെഞ്ചുറി ആയിരുന്നു. കോഹ് ലിയുടെ 71ാം സെഞ്ചുറിക്കായുള്ള കാത്തിരിപ്പ് 2022ലേക്ക് നീളുന്നു.
ടെസ്റ്റിലെ കോഹ് ലിയുടെ ബാറ്റിങ് ശരാശരിയും 2019 നവംബര്‍ മുതല്‍ താഴേക്കാണ്. 2019 നവംബര്‍ മുതലുള്ള കണക്കെടുത്താല്‍ 30ല്‍ താഴെയാണ് കോഹ് ലിയുടെ ബാറ്റിങ് ശരാശരി. ബംഗ്ലാദേശിനെതിരെ പിങ്ക് ബോള്‍ ടെസ്റ്റില്‍ സെഞ്ചുറി നേടുന്നതിന് മുന്‍പ് 12 ടെസ്റ്റാണ് കോഹ് ലി കളിച്ചത്. എന്നാല്‍ അതില്‍ 74 ആയിരുന്നു കോഹ് ലിയുടെ ഉയര്‍ന്ന സ്‌കോര്‍.
സെഞ്ചൂറിയനില്‍ ലീഡ് 200 പിന്നിട്ടു
സെഞ്ചൂറിയനില്‍ ഇന്ത്യയുടെ ലീഡ് 200 റണ്‍സ് പിന്നിട്ടു. 79 റണ്‍സിലേക്ക് രണ്ടാം ഇന്നിങ്‌സില്‍ ഇന്ത്യയുടെ സ്‌കോര്‍ എത്തിയപ്പോഴേക്കും നാല് വിക്കറ്റ് നഷ്ടമായി. 350ന് മുകളിലേക്ക് ലീഡ് എത്തിക്കാനാവും ഇന്ത്യ ലക്ഷ്യമിടുക. മായങ്ക് അഗര്‍വാളിനെ രണ്ടാം ഇന്നിങ്‌സ് തുടങ്ങിയ മൂന്നാം ദിനം തന്നെ ഇന്ത്യക്ക് നഷ്ടമായിരുന്നു.
നൈറ്റ് വാച്ച്മാനായി ഇറങ്ങിയ ശാര്‍ദുല്‍ താക്കൂര്‍ നാലാം ദിനം തുടക്കത്തില്‍ തന്നെ മടങ്ങി. 10 റണ്‍സ് എടുത്താണ് ശാര്‍ദുല്‍ കൂടാരം കയറിയത്. റബാഡക്ക് എതിരെ തുടരെ ബൗണ്ടറി നേടി കോഹ് ലി സ്‌കോര്‍ ഉയര്‍ത്തുന്നതിന്റെ സൂചന നല്‍കിയിരുന്നു. എന്നാല്‍ ജാന്‍സെനിന്റെ ഡെലിവറിയില്‍ ഡികോക്കിന് ക്യാച്ച് നല്‍കി മടങ്ങി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates