ന്യൂഡൽഹി: ഇന്ത്യൻ മുൻ പേസർ ഇർഫാൻ പഠാന്റെ ഭാര്യയുടെ ബ്ലർ ചെയ്ത ചിത്രമാണ് കഴിഞ്ഞ ദിവസം സമൂഹമാധ്യമങ്ങളിൽ ചർച്ചയായത്. ഇർഫാനും മകനും ഒപ്പമുള്ള ചിത്രത്തിൽ ഭാര്യയുടെ മുഖം മാത്രം എ‍ഡിറ്റ് ചെയ്തത് ചോദ്യം ചെയ്തായിരുന്നു പ്രതികരണങ്ങൾ ഉയർന്നത്. ഇതിനിപ്പോൾ മറുപടി നൽകുകയാണ് താരം.  

എന്റെ മകന്റെ അക്കൗണ്ടിൽ നിന്ന് എന്റെ രാഞ്ജിയാണ് ആ ഫോട്ടോ പോസ്റ്റ് ചെയ്തത്. വിദ്വേഷം ഏറ്റുവാങ്ങുകയാണ് ഞങ്ങൾ ഇപ്പോൾ. ഞാൻ ആ ഫോട്ടോ ഇവിടേയും പോസ്റ്റ് ചെയ്യട്ടേ. അവളുടെ താത്പര്യത്തിന് അവൾ തന്നെയാണ് ഫോട്ടോ ബ്ലർ ചെയ്തത്. ഞാൻ അവളുടെ പങ്കാളിയാണ്, അധിപൻ അല്ല. അവളുടെ ജീവിതം അവളുടെ താത്പര്യങ്ങൾ എന്ന ഹാഷ് ടാ​ഗോടെ പഠാൻ ട്വിറ്ററിൽ കുറിച്ചു. 

മകന്റെ ഇൻസ്റ്റ​ഗ്രാം അക്കൗണ്ടിൽ പങ്കുവെച്ച ചിത്രമാണ് വിവാദമായത്. ഭാര്യയുടെ മുഖം കാണിക്കാൻ പഠാൻ സമ്മതിക്കുന്നില്ലെന്ന നിലയിലാണ് പ്രതികരണങ്ങൾ ശക്തമായത്. ഇതോടെയാണ് ഇന്ത്യൻ മുൻ പേസർ വിശദീകരണവുമായി എത്തിയത്.