ടോക്യോ: ഒളിമ്പിക്‌സിൽ വനിതാവിഭാഗം ഫെൻസിങ്ങിൽ ഇന്ത്യയുടെ സി എ ഭവാനി ദേവിക്ക് വിജയത്തുടക്കം. മറ്റൊരു മത്സരത്തിൽ ഇന്ത്യയുടെ അമ്പെയ്ത്ത് പുരുഷ ടീം കസാഖിസ്ഥാനെ മറികടന്ന് ക്വാർട്ടർ ഫൈനലിൽ പ്രവേശിച്ചു. 

ടൂണീഷ്യയുടെ ബെൻ അസീസി നാദിയയെ കീഴ്പ്പെടുത്തിയാണ് ഭവാനി ദേവി രണ്ടാം റൗണ്ടിൽ പ്രവേശിച്ചത്. വെറും ആറുമിനിട്ട് മാത്രം നീണ്ടുനിന്ന മത്സരത്തിൽ 5-3 എന്ന സ്‌കോറിനായിരുന്നു ജയം. ലോക റാങ്കിങ്ങിൽ 29-ാം സ്ഥാനത്താണ് ഭവാനി ദേവി. നാദിയ 36-ാം സ്ഥാനക്കാരിയാണ്. ജയത്തോടെ ഭവാനി ദേവി അവസാന 32-ൽ പ്രവേശിച്ചു. 

അമ്പെയ്ത്തിൽ അതാനു ദാസ്-പ്രവീൺ യാദവ്-തരുൺദീപ് റായ് സഖ്യമാണ് കസാഖിസ്ഥാന്റെ ഇൽഫാത്ത് അബ്ദുല്ലിൻ-ഡെനിസ് ഗാൻകിൻ-സാൻഷാർ മുസ്സയേവ് സഖ്യത്തെ കീഴടക്കിയത്. 6-2 എന്ന സ്‌കോറിന് നേരിട്ടുള്ള സെറ്റുകൾക്കാണ് ഇന്ത്യൻ ടീമിന്റെ ജയം. ക്വാർട്ടർ ഫൈനലിൽ കരുത്തരായ കൊറിയയാണ് എതിരാളികൾ.