ടോക്യോ: ലോക ഒന്നാം നമ്പർ താരം സെർബിയയുടെ നൊവാക് ജോക്കോവിചിന് ഒളിംപിക്സ് പുരുഷ സിം​ഗിൾസിൽ വെങ്കല മെഡലും ഇല്ല. വെങ്കല മെഡൽ പോരാട്ടത്തിൽ ജോക്കോവിചിനെ സ്പെയിനിന്റെ പാബ്ലോ കരേനോ ബുസ്റ്റ അട്ടിമറിച്ചു. മൂന്ന് സെറ്റ് പോരാട്ടത്തിൽ ഒന്നാം സെറ്റും മൂന്നാം സെറ്റും സ്വന്തമാക്കിയാണ് സ്പാനിഷ് താരം വെങ്കല മെ‍ഡൽ ഉറപ്പിച്ചത്. സ്കോർ: 6-4, 6-7 (6-8), 6-3.

ഗോൾഡൻ സ്ലാം നേടി ചരിത്രത്തിലെ എക്കാലത്തേയും മികച്ച ടെന്നീസ് താരമെന്ന ഖ്യാതി സ്വന്തമാക്കാനിറങ്ങിയ ലോക ഒന്നാം നമ്പർ താരം നൊവാക് ജോക്കോവിചിന്റെ ആ മോഹത്തിന് സെമിയിൽ കനത്ത തിരിച്ചടി നേരിടേണ്ടി വന്നിരുന്നു. സെമി പോരാട്ടത്തിൽ ജോക്കോവിചിനെ ജർമൻ താരം അലക്‌സാണ്ടർ സ്വരേവ് അട്ടിമറിച്ചു. 

ഈ വർഷം ഓസ്‌ട്രേലിയൻ ഓപ്പൺ, ഫ്രഞ്ച് ഓപ്പൺ, വിംബിൾഡൺ കിരീടങ്ങൾ നേടിയാണ് ജോക്കോവിച് ടോക്യോയിൽ മത്സരിക്കാനെത്തിയത്. ഇവിടെ സ്വർണം നേടി ഈ സീസണിലെ യുഎസ് ഓപൺ കിരീടം കൂടി നേടി ഗോൾഡൻ സ്ലാം എന്ന അപൂർവ നേട്ടം സ്വന്തമാക്കാനുള്ള തയ്യാറെടുപ്പുമായാണ് സെർബിയൻ താരം ടോക്യോയിൽ എത്തിയത്. 

എന്നാൽ സെമിയിൽ സ്വരേവിന്റെ പോരാട്ട വീര്യത്തിന് മുന്നിൽ അതെല്ലാം അവസാനിച്ചു. പിന്നാലെ നടന്ന വെങ്കല മെഡൽ പോരാട്ടത്തിലും ജോക്കോയ്ക്ക് നിരാശയായിരുന്നു ഫലം.