തിരുവനന്തപുരം : കെസിഎല്ലില്‍ തൃശൂര്‍ ടൈറ്റന്‍സിനെതിരെ ട്രിവാന്‍ഡ്രം റോയല്‍സിന് 223 റണ്‍സ് വിജയലക്ഷ്യം. ആദ്യം ബാറ്റ് ചെയ്ത തൃശൂര്‍ 20 ഓവറില്‍ നാല് വിക്കറ്റ് നഷ്ടത്തിലാണ് 222 റണ്‍സെടുത്തത്. ഓപ്പണര്‍ അഹ്മദ് ഇമ്രാന്റെയും അക്ഷയ് മനോഹറിന്റെയും ഉജ്ജ്വല ഇന്നിങ്‌സുകളാണ് തൃശൂരിനെ കൂറ്റന്‍ സ്‌കോറില്‍ എത്തിച്ചത്.

തൃശൂരിന്റെ ആരാധകര്‍ക്കായി വീണ്ടുമൊരു ബാറ്റിങ് വെടിക്കെട്ടിന്റെ പൂരമൊരുക്കുകയായിരുന്നു അഹ്മദ് ഇമ്രാന്‍. അവിസ്മരണീയമായൊരു ഇന്നിങ്‌സായിരുന്നു റോയല്‍സിനെതിരെ അഹ്മദ് ഇമ്രാന്റേത്. ആദ്യ ഓവറിലെ അവസാന മൂന്ന് പന്തുകളും അതിര്‍ത്തി കടത്തിയാണ് ഇമ്രാന്‍ തന്റെ കൂറ്റനടികള്‍ക്ക് തുടക്കമിട്ടത്. അടുത്ത ഓവറിലെയും അവസാന മൂന്ന് പന്തുകളില്‍ ഇമ്രാന്‍ തുടരെ ബൗണ്ടറികള്‍ നേടി. വിക്കറ്റിന്റെ ഇരുവശങ്ങളിലേക്കും അനായാസം ഷോട്ടുകള്‍ പായിച്ച ഇമ്രാന്‍ അതിവേഗം ഇന്നിങ്‌സ് മുന്നോട്ട് നീക്കി. 23 പന്തുകളിലാണ് ഇമ്രാന്‍ അന്‍പത് തികച്ചത്. മറുവശത്ത് 32 റണ്‍സെടുത്ത ആനന്ദ് കൃഷ്ണന്‍ ഇമ്രാന് മികച്ച പിന്തുണ നല്കി. ഇരുവരും ചേര്‍ന്നുള്ള 99 റണ്‍സിന്റെ ഓപ്പണിങ് കൂട്ടുകെട്ടിന് അവസാനമിട്ടത് എം നിഖിലാണ്. പത്താം ഓവറിലെ അഞ്ചാം പന്തില്‍ ആനന്ദ് കൃഷ്ണനെ ക്ലീന്‍ ബൌള്‍ഡാക്കിയ നിഖില്‍ തൊട്ടടുത്ത പന്തില്‍ വിഷ്ണു മേനോനെയും മടക്കി.

എന്നാല്‍ നിഖിലിന്റെ അടുത്ത ഓവറില്‍ തുടരെ മൂന്ന് പന്തുകള്‍ അതിര്‍ത്തി കടത്തിയായിരുന്നു ഇമ്രാന്റെ മറുപടി. ബൗളര്‍മാര്‍ തോറ്റു മടങ്ങിയ പോരാട്ടത്തില്‍ നിര്‍ഭാഗ്യമായിരുന്നു ഒടുവില്‍ ഇമ്രാന്റെ ഇന്നിങ്‌സിന് അവസാനമിട്ടത്. അബ്ദുള്‍ ബാസിദ് എറിഞ്ഞ പന്ത് വിക്കറ്റ് കീപ്പറുടെ കൈകളില്‍ നിന്ന് വഴുതി ബെയ്‌ലുകള്‍ തെറിപ്പിക്കുമ്പോള്‍ ഇമ്രാന്റെ കാലുകള്‍ ക്രീസിന് വെളിയിലായിരുന്നു. മൂന്നാം അമ്പയര്‍ ഔട്ട് വിധിക്കുമ്പോള്‍ 49 പന്തുകളില്‍ 13 ഫോറും നാല് സിക്‌സുമടക്കം 98 റണ്‍സായിരുന്നു ഇമ്രാന്റെ സമ്പാദ്യം. തുടര്‍ന്നെത്തിയ അക്ഷയ് മനോഹര്‍ അതേ വേഗത്തില്‍ തകര്‍ത്തടിച്ചതോടെയാണ് തൃശൂരിന്റെ സ്‌കോര്‍ 200 കടന്ന് മുന്നേറിയത്. വെറും 20 പന്തുകളിലായിരുന്നു അക്ഷയ് അര്‍ദ്ധശതകം പൂര്‍ത്തിയാക്കിയത്. 22 പന്തുകളില്‍ ഏഴ് സിക്‌സടക്കം 54 റണ്‍സുമായി അക്ഷയ് പുറത്താകാതെ നിന്നു. 20 പന്തുകളില്‍ നിന്നും 31 റണ്‍സുമായി ഷോണ്‍ റോജറും മികച്ച രീതിയില്‍ ബാറ്റ് വീശി.