ദുബൈ: അണ്ടര്‍ 19 ഏഷ്യാകപ്പ് ഫൈനലില്‍ പാക് ബൗളറോട് കയര്‍ത്ത് ഇന്ത്യന്‍ കൗമാര താരം വൈഭവ് സൂര്യവംശി. മത്സരത്തില്‍ തന്നെ പുറത്താക്കിയ പാക് ബൗളര്‍ക്ക് നേരെ ആയിരുന്നു വൈഭവിന്റെ പ്രതികരണം. മത്സരത്തില്‍ 10 പന്തുകള്‍ നേരിട്ട വൈഭവ് 26 റണ്‍സെടുത്താണു പുറത്തായത്. മൂന്നു സിക്‌സുകളും ഒരു ഫോറും ബൗണ്ടറി കടത്തിയ താരം അഞ്ചാം ഓവറിലെ ആദ്യ പന്തിലാണു പുറത്തായത്.

പാക് പേസര്‍ അലി റാസയുടെ പന്തില്‍ വിക്കറ്റ് കീപ്പര്‍ ഹംസ സഹൂര്‍ ക്യാച്ചെടുത്താണു വൈഭവിനെ പുറത്താക്കിയത്. പുറത്തായി മടങ്ങുന്നതിനിടെയായിരുന്നു പാക് ബോളറുമായി വൈഭവ് തര്‍ക്കിച്ചത്. പുറത്തായതിന് പിന്നാലെ അലി റാസയുടെ നേരെ വിരല്‍ ചൂണ്ടിയ ശേഷം തന്റെ ഷൂസ് കാണിച്ചുകൊടുക്കുകയാണു വൈഭവ് ചെയ്തത്. സംഭവത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍ വൈറലാണ്.

ടൂര്‍ണമെന്റില്‍ യുഎഇയ്‌ക്കെതിരെ സെഞ്ച്വറിയും (171), മലേഷ്യയോട് അര്‍ധ സെഞ്ചറിയും (50) നേടിയ വൈഭവ് ഗ്രൂപ്പ് ഘട്ടത്തില്‍ പാകിസ്ഥാനെ നേരിട്ടപ്പോഴും തിളങ്ങിയിരുന്നില്ല. ഡിസംബര്‍ 14ന് നടന്ന പോരാട്ടത്തില്‍ അഞ്ചു റണ്‍സാണ് വൈഭവ് അടിച്ചത്.