ന്യൂഡൽഹി: രാജ്യം 77ാം സ്വാതന്ത്ര്യ ദിനം ആഘോഷിക്കുകയാണ്. ഈ അഭിമാന ദിവസം തന്റെ ജീവിതത്തിൽ എങ്ങനെയാണെന്നു വ്യക്തമാക്കുകയാണ് ഇന്ത്യൻ ക്രിക്കറ്റ് ടീമിലെ സൂപ്പർ‌ താരവും മുൻ നായകനുമായ വിരാട് കോഹ്‌ലി. 

അച്ഛന്റെ ജന്മ ദിനവും സ്വാതന്ത്ര്യ ദിനവും ഒരേ ദിവസമാണെന്നു കോഹ്‌ലി പറയുന്നു. അതിനാൽ രണ്ട് ആഘോഷങ്ങളാണ് ഈ ദിവസം തനിക്കെന്നും കോഹ്‌ലി ഓർക്കുന്നു. കുട്ടിക്കാലത്ത് സ്വാതന്ത്ര്യ ദിനത്തിൽ പട്ടം പറത്തി ആത് ആഘോഷിച്ചതും കോഹ്‌ലി ഓർത്തെടുത്തു. സ്റ്റാർ സ്പോർട്സിനു നൽകിയ അഭിമുഖത്തിലാണ് താരം മനസ് തുറന്നത്. 

'1947 മുതലുള്ള നമ്മുടെ അഭിമാന ദിനമാണല്ലോ ഓ​ഗസ്റ്റ് 15. എന്റെ ഹൃദയത്തിൽ ഈ ദിവസത്തിനു സവിശേഷ സ്ഥാനമാണ്. നമ്മുടെ രാജ്യത്തെ സംബന്ധിച്ച് ചരിത്രത്തിലെ ഏറ്റവും പ്രധാനപ്പെട്ട ദിവസം. നാം അതു വിപുലമായി തന്നെ ആഘോഷിക്കുന്നു.' 

'എനിക്ക് ഈ ദിവസം രണ്ട് ആഘോഷമാണ്. ഒന്ന് സ്വാതന്ത്ര്യ ദിനവും മറ്റൊന്നു അച്ഛന്റെ ജന്മ ദിനവും. രണ്ടും ഞാൻ ആഘോഷിക്കാറുണ്ട്. സ്വാതന്ത്ര്യ ദിനം മറ്റ് പല കാര്യങ്ങളാൽ കൂടിയും എനിക്ക് പ്രിയപ്പെട്ടതാണ്.' 

'കുട്ടിക്കാലത്ത് ഇന്ത്യൻ പതാക ഉയർത്തുന്നതാണ് ആദ്യ സന്തോഷം. പിന്നാലെ ദേശീയ ​ഗാനം ആലപിക്കും. അതെല്ലാം എന്നിൽ വലിയ അഭിമാനമുണ്ടാക്കാറുണ്ട്. പിന്നീട് പലതരം കളികളാണ്. അതിൽ ഏറ്റവും പ്രധാനപ്പെട്ടതാണ് പട്ടം പറത്തൽ. ‍ഞങ്ങൾ ഡൽഹിക്കാർക്ക് വലിയ സംസ്കാരമുണ്ട് ഇക്കാര്യത്തിൽ.'

'ഞങ്ങൾ കുട്ടികൾക്ക് അതൊരു സൂപ്പർ നിമിഷമാണ്. അതിനായി തലേ ദിവസം രാത്രി തന്നെ തയ്യാറെടുക്കും. ഈ ദിനം വരുമ്പോൾ എന്റെ മനസിൽ ഇത്തരം ഓർമകളെല്ലാം കടന്നു വരാറുണ്ട്'- കോഹ്‌ലി ഓർത്തെടുത്തു. 

ഈ വാര്‍ത്ത കൂടി വായിക്കൂ

അയര്‍ലന്‍ഡ് പര്യടനം; ക്യാപ്റ്റന്‍ ബുമ്രയും സംഘവും പറന്നു

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ