അ‍ഡ്‍‍ലെയ്ഡ്: ന്യൂസിലൻഡിനോടു മൂന്ന് മത്സരങ്ങളടങ്ങിയ പരമ്പര സമ്പൂർണമായി അടിയറ വച്ചപ്പോൾ ഇന്ത്യയുടെ ലോക ടെസ്റ്റ് ചാംപ്യൻഷിപ്പ് ഫൈനൽ പ്രവേശ വലിയ ചോദ്യ ചിഹ്നത്തിൽ നിന്നിരുന്നു. ഓസ്ട്രേലിയയെ അവരുടെ മണ്ണിൽ ചെന്നു 4-0ത്തിനു വീഴ്ത്തേണ്ട അവസ്ഥയിലേക്ക് കാര്യങ്ങൾ എത്തിച്ചു. ഓസീസിനെതിരായ ഒന്നാം ടെസ്റ്റിൽ പക്ഷേ ഇന്ത്യ എല്ലാ തരത്തിലും തിരിച്ചെത്തുന്ന കാഴ്ചയായിരുന്നു. ആദ്യ കടമ്പ ജയത്തിലൂടെ ഇന്ത്യ കടന്നു.

അതിനിടെ ​ദക്ഷിണാഫ്രിക്ക, ഇം​ഗ്ലണ്ട് ടീമുകൾ യഥാക്രമം ശ്രീലങ്ക, ന്യൂസിലൻഡ് ടീമുകളെ വീഴ്ത്തിയതോടെ ഫലത്തിൽ ആശ്വാസം ഇന്ത്യക്കായി മാറി. 4-0ത്തിനു ഓസീസിനെ വീഴ്ത്തേണ്ടിയിരുന്ന ഇന്ത്യക്ക് ഈ രണ്ട് ടീമുകളുടെ ജയം വലിയ ആശ്വാസമായി. ഓസ്ട്രേലിയക്കെതിരായ പരമ്പര 2-2 എന്ന നിലയിൽ എത്തിച്ചാലും ഇന്ത്യക്ക് ഇനി ഫൈനൽ കളിക്കാമെന്ന സാധ്യത തുറന്നു കിട്ടി. ഓസീസിന് ഫൈനലിലെത്താൻ ഇനി ഇന്ത്യയെ 4-0ത്തിനു വീഴ്ത്തണം.

ഇന്ത്യ, ഓസ്ട്രേലിയ, ദക്ഷിണാഫ്രിക്ക ടീമുകൾക്കാണ് ഏറ്റവും കൂടുതൽ ഫൈനൽ സാധ്യതയുള്ളത്. നിലവിൽ പോയിന്റ് പട്ടികയിൽ ഇന്ത്യയാണ് ഒന്നാമത്. ദക്ഷിണാഫ്രിക്ക രണ്ടാമതും ഓസീസ് മൂന്നാമതുമാണ്. ശ്രീലങ്കക്കെതിരെ ആദ്യ ടെസ്റ്റ് ജയിച്ച ദക്ഷിണാഫ്രിക്കയ്ക്ക് അടുത്ത ടെസ്റ്റ് ജയിച്ച് പരമ്പര നേടിയും പാകിസ്ഥാനെതിരെ നടക്കാനിരിക്കുന്ന പരമ്പര തൂത്തുവാരിയും നേരിച്ച് ഫൈനലുറപ്പിക്കാം. ഈ പരമ്പരകളിൽ ഒരു മത്സരം തോറ്റാൽ പക്ഷേ അവർക്ക് കാര്യങ്ങൾ സങ്കീർണമാക്കും. അപ്പോൾ ഇന്ത്യ, ശ്രീലങ്ക ടീമുകളുടെ മത്സര ഫലം ആശ്രയിക്കണം.

ലങ്കയ്ക്ക് ദക്ഷിണാഫ്രിക്കക്കെതിരായ അവസാന ടെസ്റ്റും ഓസീസിനെതിരായ പരമ്പരയും നേടിയാൽ മാത്രമേ പ്രതീക്ഷയുള്ളു. ഇം​ഗ്ലണ്ടിനെതിരായ ആദ്യ ടെസ്റ്റ് തോറ്റതോടെ ന്യൂസിലൻ‍ഡിന്റെ പ്രതീക്ഷകൾക്ക് തിരിച്ചടിയായി. ഇം​ഗ്ലണ്ടിനെതിരെ ഇനിയുള്ള മത്സരങ്ങൾ ജയിച്ചാൽ പോലും വിദൂര സാധ്യത മാത്രമാണ് അവർക്കുള്ളത്. ഇന്ത്യ- ഓസ്ട്രേലിയ, ശ്രീലങ്ക- ഓസ്ട്രേലിയ പരമ്പരകൾ സമനിലയിൽ അവസാനിച്ചാലേ ഈ സാധ്യത യാഥാർഥ്യമാകു.

പെർത്തിൽ ഇന്ത്യയോടു തോറ്റതും ദക്ഷിണാഫ്രിക്ക ആദ്യ പോരിൽ ശ്രീലങ്കയെ വീഴ്ത്തിയതും ഓസീസിന്റെ കണക്കുകൂട്ടൽ അപ്പാടെ തെറ്റിച്ചു. ഇനി ശേഷിക്കുന്ന ആറ് പോരിൽ 4 വിജയവും ഒരു സമനിലയുമാണ് ഫൈനൽ ബെർത്തിനു അവർക്ക് വേണ്ടത്. ഇന്ത്യക്കെതിരായ പരമ്പരയിൽ രണ്ട് വിജയമെങ്കിലും ഉറപ്പിക്കാൻ അവർ ശ്രമിച്ചേക്കും. ഇം​ഗ്ലണ്ട്, പാകിസ്ഥാൻ, വെസ്റ്റ് ഇൻഡീസ്, ബം​ഗ്ലാദേശ് ടീമുകളുടെ സാധ്യതകൾ ഏതാണ്ട് അവസാനിച്ച മട്ടാണ്.

പരിശീലനത്തിനിടെ പരിക്ക്, സ്റ്റീവ് സ്മിത്തും കളിക്കില്ലേ?

ഇന്ത്യയുടെ ഫൈനൽ സാധ്യതകൾ

5-0, 4-1, 4-0, 3-0 എന്നീ നിലകളിൽ പരമ്പരയിൽ മുന്നേറിയാൽ ഇന്ത്യക്ക് നേരിട്ട് ഫൈനലിലേക്ക് കടക്കാം. മറ്റൊരു ടീമിന്റേയും ഫലം ആശ്രയിക്കേണ്ടതില്ല.

ഓസ്ട്രേലിയ ഇന്ത്യയെ 3-1നു വീഴ്ത്തിയാൽ ദക്ഷിണാഫ്രിക്ക- ശ്രീലങ്ക രണ്ടാം ടെസ്റ്റിൽ ലങ്ക ജയിക്കുകയോ മത്സരം സമനിലയിൽ അവസാനിക്കുകയോ വേണം.

ഇന്ത്യ 3-2നു ഓസീസിനെ വീഴ്ത്തിയാൽ ജനുവരിയിൽ നടക്കുന്ന ശ്രീലങ്ക- ഓസ്ട്രേലിയ ടെസ്റ്റ് പരമ്പര സമനിലയിൽ അവസാനിക്കണം.

ഓസീസിനെതിരായ പോരാട്ടം 2-2നാണ് ഇന്ത്യ അവസാനിപ്പിക്കുന്നതെങ്കിൽ സാധ്യത ഇങ്ങനെ വരും. ദക്ഷിണാഫ്രിക്ക- ശ്രീലങ്ക രണ്ടാം ടെസ്റ്റിൽ പ്രോട്ടീസ് ജയിക്കണം. ശ്രീലങ്ക- ഓസ്ട്രേലിയ പരമ്പര ലങ്ക 2-0ത്തിനു സ്വന്തമാക്കണം.