ന്യൂഡല്‍ഹി: വിരാട് കോഹ്‌ലിയുടെ ബാറ്റിങ് ഫോമിനെ ചൊല്ലി ഉയര്‍ന്ന ചോദ്യങ്ങളോട് രൂക്ഷമായി പ്രതികരിച്ച് രോഹിത് ശര്‍മ. നിങ്ങള്‍ കുറച്ച് സമയത്തേക്ക് മിണ്ടാതിരുന്നാല്‍ മതി, എനിക്ക് ഉറപ്പുണ്ട് എല്ലാം ശരിയാകും എന്ന്‌, രോഹിത് ശര്‍മ പറയുന്നു. 

മാധ്യമങ്ങളാണ് ഇതിനെല്ലാം തുടക്കമിടുന്നത്. എനിക്ക് കാണാന്‍ കഴിയുന്നത്, കോഹ് ലി നല്ല മാനസിക നിലയിലാണ് എന്നാണ്. എങ്ങനെ സമ്മര്‍ദത്തെ കൈകാര്യം ചെയ്യണം എന്ന് കോഹ് ലിക്ക് അറിയാം, കോഹ് ലിയുടെ ഫോം ഇല്ലായ്മയെ എങ്ങനെയാണ് ക്യാപ്റ്റനും കോച്ചും നേരിടാന്‍ പോകുന്നത് എന്ന് ചോദ്യത്തിനായിരുന്നു രോഹിത്തിന്റെ മറുപടി. 

മൂന്ന് ഏകദിനങ്ങളിലും കോഹ് ലി നിരാശപ്പെടുത്തി

വിന്‍ഡിസിന് എതിരായ മൂന്ന് ഏകദിനങ്ങളിലും കോഹ് ലി നിരാശപ്പെടുത്തിയതോടെയാണ് ഫോമിനെ ചൊല്ലിയുള്ള ചര്‍ച്ചകള്‍ സജീവമായത്. മൂന്ന് ഏകദിനങ്ങളില്‍ നിന്ന് കോഹ്‌ലിക്ക് നേടാനായത് 26 റണ്‍സ് മാത്രം. ഒരു ഏകദിന പരമ്പരയില്‍ 50ല്‍ താഴെ റണ്‍സ് കോഹ് ലി സ്‌കോര്‍ ചെയ്യുന്നത് 2015ന് ശേഷം ആദ്യമായിരുന്നു. സൗത്ത് ആഫ്രിക്കയ്ക്ക് എതിരായ രണ്ട് ടെസ്റ്റില്‍ നിന്ന് രണ്ട് അര്‍ധ ശതകമാണ് കോഹ് ലി കണ്ടെത്തിയത്. 

ഏകദിന പരമ്പരയ്ക്കിടയില്‍ കോഹ്‌ലിയുടെ ഫോമിനെ ചൊല്ലി ഉയര്‍ന്ന ചോദ്യങ്ങളും രോഹിത് തള്ളിയിരുന്നു. ആത്മവിശ്വാസം നഷ്ടപ്പെട്ടതാണോ കോഹ് ലിയുടെ ഫോം ഇല്ലായ്മയ്ക്ക് കാരണം എന്നായിരുന്നു അന്ന് മാധ്യമ പ്രവര്‍ത്തകര്‍ ചോദിച്ചത്. നിങ്ങള്‍ ആരെക്കുറിച്ചാണ് ഈ പറയുന്നത് എന്ന് ചോദിച്ചാണ് ഈ ചോദ്യങ്ങളെ രോഹിത് അന്ന് ചിരിച്ചു തള്ളിയത്.