ചണ്ഡീഗഢ്: ഇന്ത്യന്‍ ലെഗ്‌സ്പിന്നര്‍ യുസ്‌വേന്ദ്ര ചഹലിന്റെ വിവാഹ വീഡിയോയുടെ ടീസര്‍ പുറത്തിറങ്ങി. ചഹലും ധനശ്രീ വര്‍മയും കഴിഞ്ഞ ഡിസംബറിലാണ് വിവാഹിതരായത്. ഇതിന്റെ വീഡിയോ ടീസറാണ് ഇപ്പോള്‍ പുറത്തിറങ്ങിയിരിക്കുന്നത്. ഈ മാസം 27നാണ് വീഡിയോയുടെ റിലീസ്. 

വീഡിയോയുടെ ടീസര്‍ ചഹല്‍ തന്റെ ഇന്‍സ്റ്റഗ്രാം പേജിലൂടെ പങ്കിട്ടിട്ടുണ്ട്. 'നീ എന്റെ പെണ്ണാണ്, ഞാന്‍ നിന്റെ ചെക്കനും. ഞാന്‍ നിന്നെ ഒരുപാട് ഒരുപാട് ഇഷ്ടപ്പെടുന്നു'- എന്ന കുറിപ്പോടെയാണ് ചഹല്‍ ടീസര്‍ പങ്കിട്ടിരിക്കുന്നത്. 

നൃത്തവും ക്രിക്കറ്റും കുഞ്ഞു കുഞ്ഞു രസകരമായ നിമിഷങ്ങളും നിരവധി ചിരി മുഹൂര്‍ത്തങ്ങളുമൊക്കെയായി വലിയൊരു കാഴ്ച തന്നെ ആരാധകര്‍ക്കായി വീഡിയോയിലുണ്ടെന്ന് ടീസര്‍ കാണുമ്പോള്‍ തന്നെ വ്യക്തമാകും. ധനശ്രീ കൊറിയോഗ്രാഫറും യുട്യൂബറും ഒക്കെയാണ്. അതിനാല്‍ തന്നെ നൃത്തവും സംഗീതവും ചേരുന്ന ഒട്ടനവധി നിമിഷങ്ങള്‍ വീഡിയോയിലുണ്ടാകും. 

ഇതിനോടകം തന്നെ നിരവധി പേര്‍ ടീസര്‍ കണ്ടു കഴിഞ്ഞു. അഭിനന്ദനവുമായി നിരവധി കമന്റുകളും വീഡിയോക്ക് ലഭിക്കുന്നുണ്ട്.