മാഞ്ചസ്റ്റർ: മാഞ്ചസ്റ്റർ യുനൈറ്റഡിനെ പരിശീലിപ്പിക്കാൻ ഓൾഡ് ട്രാഫോർഡിലേക്ക് സർ അലക്സ് ഫെർ​ഗൂസൻ വീണ്ടുമെത്തുന്നു. ഫെർ​ഗൂസന് കീഴിൽ 1999ൽ യുവേഫ ചാംപ്യൻസ് ലീഗ്, ഇംഗ്ലിഷ് പ്രീമിയർ ലീഗ്, എഫ്എ കപ്പ് എന്നിവ സ്വന്തമാക്കി റെക്കോർഡ് ട്രിപ്പിൾ യുനൈറ്റഡ് ആഘോഷിച്ചിരുന്നു. ആ ആഘോഷങ്ങളുടെ ഇരുപതാം വർഷികത്തിന്റെ ഭാഗമായാണ് 77കാരനായ ഫെർഗൂസൻ വീണ്ടും വരുന്നത്.  

ചാംപ്യൻസ് ലീഗിൽ 2-1നു ജർമൻ ക്ലബ് ബയേൺ മ്യൂണിക്കിനെതിരെയായിരുന്നു യുനൈറ്റഡിന്റെ വിജയം. 20ാം വാർഷികാഘോഷത്തിന്റെ ഭാഗമായി യുണൈറ്റഡിന്റെ ലെജൻഡ്സ് ടീം ബയേൺ മ്യൂണിക്ക് ടീമിനെ നേരിടും. ഈ മത്സരത്തിൽ യുനൈറ്റഡ് ലെജൻഡ്സിന്റെ പരിശീലകനായാണ് ഫെർഗൂസൻ വീണ്ടും തന്ത്രമോതാൻ ഡ​ഗൗട്ടിലെത്തുന്നത്. മെയ് 26നാണ് മത്സരം അരങ്ങേറുന്നത്. 

കഴിഞ്ഞ മെയിൽ തലച്ചോറിൽ രക്തസ്രാവം ഉണ്ടായതിനെത്തുടർന്ന് ശസ്ത്രക്രിയയ്ക്കു വിധേയനായ ഫെർഗൂസൻ ആരോഗ്യനില വീണ്ടെടുത്തിട്ടുണ്ട്. യുനൈറ്റഡിന്റെ കളികൾ കാണാൻ ഇപ്പോൾ സ്റ്റേഡിയത്തിൽ എത്താറുമുണ്ട് ഫെർ​ഗി.