ഹൈദരാബാദ്: തായ്‌വന്‍ താരവും ലോക ഒന്നാം നമ്പറുമായ തായ് സു യിങിന് മുന്നില്‍ അടിയറവ് പറയുന്ന പതിവ് തെറ്റിക്കാതെ സൈന നേഹ്‌വാള്‍. ഫ്രഞ്ച് ഓപണ്‍ ബാഡ്മിന്റണ്‍ പോരാട്ടത്തിന്റെ ക്വാര്‍ട്ടര്‍ ഫൈനലിലാണ് സൈന ഇത്തവണ തോല്‍വി വഴങ്ങിയത്. 

നേര്‍ക്കുനേര്‍ പോരില്‍ തുടര്‍ച്ചയായി ഇത് 12ാം തവണയാണ് സൈനയെ തായ് വീഴ്ത്തുന്നത്. കഴിഞ്ഞാഴ്ച ഡെന്മാര്‍ക്ക് ഓപണ്‍ ഫൈനലിന്റെ ആവര്‍ത്തനമായി ക്വാര്‍ട്ടര്‍ മാറി. സ്‌കോര്‍: 22-20, 21-11.

ക്വാര്‍ട്ടറില്‍ നേരിട്ടുള്ള ഗെയിമുകളിലായിരുന്നു സൈനയുടെ തോല്‍വി. ആദ്യ ഗെയിമില്‍ 20-16നു ലീഡ് ചെയ്യുമ്പോള്‍ നാല് ഗെയിം പോയിന്റുകള്‍ നഷ്ടമാക്കിയതാണ് മത്സരത്തില്‍ സൈനയ്ക്ക് തിരിച്ചടിയായത്. തിരിച്ചുവരവ് നടത്തിയ തായ് 22-20നു ആദ്യ ഗെയിം സ്വന്തമാക്കി. രണ്ടാം ഗെയിമില്‍ മാനസികമായ മുന്‍തൂക്കവും താരം നേടിയതോടെ സൈനയെ നിഷ്പ്രഭമാക്കി തായ് 36 മിനുട്ടില്‍ മത്സരം അവസാനിപ്പിച്ചു.