ബാം​ഗ്ലൂർ റോയൽ ചലഞ്ചേഴ്സിൽ നിന്നും വിജയം കൈപ്പിടിയിൽ ഒതുക്കിയ ആന്ദ്രേ റസ്സലിനെ ബാഹുബലിയാക്കി ഷാരൂഖ് ഖാൻ. അഭിനന്ദിക്കാൻ ഇതിൽപരം വാക്കുകൾ ഇല്ലെന്നും കിങ് ഖാൻ ട്വീറ്റ് ചെയ്തു. ചിത്രം ബാഹുബലിയുടെ അണിയറ പ്രവർത്തകരും പങ്കുവച്ചതോടെ വൈറലാവുകയായിരുന്നു. 

അക്ഷരാർത്ഥത്തിൽ ബാറ്റിങ് വെടിക്കെട്ടായിരുന്നു റസ്സൽ ക്രീസിൽ നിന്ന സമയമത്രയും . 'വിചാരിച്ചിടത്തേക്കെല്ലാം ഞാൻ സിക്സറുകൾ പായിച്ചു'വെന്നായിരുന്നു മത്സര ശേഷം താരത്തിന്റെ പ്രതികരണം.

ജയിച്ചുവെന്ന് തോന്നിയ കളിയാണ് റസ്സലിന്റെ അസാമാന്യ ബാറ്റിങിലൂടെ ബാം​ഗ്ലൂരിന്റെ കൈയ്യിൽ നിന്നും നഷ്ടമായത്. അവിശ്വസനീയമെന്നായിരുന്നു കണ്ടു നിന്നവരുടെ വാക്കുകൾ. വെറും 13 പന്തിൽ 48 റൺസാണ് റസ്സൽ നേടിയത്.

 ടിം സൗത്തി എറിഞ്ഞ 19-ാം ഓവറിൽ മാത്രം റസ്സൽ അടിച്ചു കൂട്ടിയത് നാല് സിക്സും ഒരു ഫോറും. ചിന്ന സ്വാമി സ്റ്റേഡിയത്തിലെ സ്വന്തം കാണികളുടെ മുമ്പിലാണ് കൊൽക്കൊത്ത നൈറ്റ് റൈഡേഴ്സ് ബാം​ഗ്ലൂരിനെ തകർത്തെറിഞ്ഞത്.