കാത്തിരിപ്പിന് ഒടുവില്‍ ഇന്ത്യയും പാക്കിസ്ഥാനും ബുധനാഴ്ച ദുബൈ രാജ്യാന്തര സ്റ്റേഡിയത്തില്‍ നേര്‍ക്കു നേര്‍ വരും.  ചിര വൈരികള്‍ തമ്മിലുള്ള പോര് നടക്കുമ്പോള്‍ അധോലോക നേതാവ് ദാവൂത് ഇബ്രാഹിമിനോട് അടുപ്പമുള്ള പിടികിട്ടാ പുള്ളികളായ രണ്ട് പേര്‍ സ്റ്റേഡിയത്തിലേക്കെത്തുമെന്ന റിപ്പോര്‍ട്ടാണ് പുറത്തു വരുന്നത്. 

ഡി കമ്പനിയുമായി ബന്ധപ്പട്ടവരാണ് ഇവിടേക്കെത്തുന്നത്.  ദാവൂദ് ഇബ്രാഹിമിന്റെ ബന്ധുക്കളില്‍ ചിലര്‍ ഇന്ത്യ-പാക് മത്സരം കാണുന്നതിന് വേണ്ടി മുംബൈയില്‍ നിന്നും കറാച്ചിയില്‍ നിന്നും ദുബൈയില്‍ എത്തി കഴിഞ്ഞു എന്നാണ് റിപ്പോര്‍ട്ട്. ദാവുദുമായി ബന്ധപ്പെട്ടവരുടെ സാന്നിധ്യമുണ്ടാകുമെന്ന റിപ്പോര്‍ട്ടിനെ തുടര്‍ന്ന് ആറ് രാജ്യങ്ങളില്‍ നിന്നുമുള്ള രഹസ്യാന്വേഷണ ഏജന്‍സികളാണ് ഇന്ത്യ-പാക് മത്സരം സൂക്ഷ്മമായി നിരീക്ഷിക്കുന്നതിനായി എത്തുക. 

ഡി കമ്പനി അനുയായികളെ നിരീക്ഷിക്കുന്നതിലൂടെ പാക്കിസ്ഥാനിലെ ദാവൂദിന്റെ രഹസ്യവാസത്തെ കുറിച്ച് സൂചന ലഭിക്കുമെന്നാണ് രഹസ്യാന്വേഷണ വിഭാഗങ്ങളുടെ കണക്കു കൂട്ടല്‍. ഇന്ത്യ-പാക് മത്സരത്തിലെ വാദുവെപ്പില്‍ ദാവൂദിനുള്ള താത്പര്യവും രഹസ്യാന്വേഷണ ഏജന്‍സികളെ മത്സരം സൂക്ഷ്മമായി നിരീക്ഷിക്കുന്നതിന് പ്രേരിപ്പിക്കുന്നു.

ഇന്ത്യയ്ക്ക് പുറമെ, യുകെ, യുഎസ്, റഷ്യ, ചൈന എന്നിവിടങ്ങളില്‍ നിന്നുമുള്ള രഹസ്യാന്വേഷണ വിഭാഗമാണ് ഇന്ത്യ-പാക് മത്സരത്തിലേക്ക് എത്തുന്നത്. മുംബൈ സ്‌ഫോടന പരമ്പരയിലെ സൂത്രധാരനായ ദാവൂദ് ഇബ്രാഹിമിനെ പിടികൂടാന്‍ ഇന്ത്യയ്ക്ക് നേരത്തെ തന്നെ അമേരിക്ക സഹായം വാഗ്ദാനം ചെയ്തിരുന്നു.