പൂനെ: ദക്ഷിണാഫ്രിക്കയ്‌ക്കെതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യ കൂറ്റന്‍ സ്‌കോറിലേക്ക്. ക്യാപ്റ്റന്‍ വിരാട് കോഹ്‌ലി നേടിയ ഇരട്ട സെഞ്ച്വറിയുടെ കരുത്തിലാണ് ഇന്ത്യന്‍ മുന്നേറ്റം. 

295 പന്തുകള്‍ നേരിട്ട് 28 ബൗണ്ടറികളുടെ അകമ്പടിയിലാണ് കോഹ്‌ലിയുടെ ഇരട്ട ശതകം. കരിയറിലെ ഏഴാം ഇരട്ട സെഞ്ച്വറിയാണ് ക്യാപ്റ്റന്‍ പൂനെയില്‍ പടുത്തുയര്‍ത്തിയത്. ഒടുവില്‍ വിവരം കിട്ടുമ്പോള്‍ ഇന്ത്യ നാല് വിക്കറ്റ് നഷ്ടത്തില്‍ 496 റണ്‍സെന്ന നിലയിലാണ്.

208 റണ്‍സുമായി കോഹ്‌ലിയും, 33 റണ്‍സുമായി രവീന്ദ്ര ജഡേജയുമാണ് ക്രീസില്‍.
 

നേരത്തെ ടോസ് നേടി ബാറ്റിങ് തിരഞ്ഞെടുത്ത ഇന്ത്യക്കായി ഓപണര്‍ മായങ്ക് അഗര്‍വാള്‍ (108) സെഞ്ച്വറി നേടി അടിത്തറയിട്ടു. ചേതേശ്വര്‍ പൂജാര (58), അജിന്‍ക്യ രഹാനെ (59) എന്നിവരുടെ അര്‍ധ സെഞ്ച്വറികളും ഇന്ത്യന്‍ ഇന്നിങ്‌സിന് കരുത്തായി.