ലോകത്ത് ഏറ്റവുമധികം പ്രതിഫലം വാങ്ങുന്ന വനിതാ കായിക താരമായി ജപ്പാന്റെ ടെന്നീസ് താരം നവോമി ഒസാക്ക. സെറീന വില്ല്യംസിനെ പിന്നിലാക്കിയാണ് 22-കാരിയായ ഒസാക്കയുടെ നേട്ടം. സെറീനയേക്കാൾ 11 കോടി രൂപ അധികമാണ് ഒസാക്കയുടെ സമ്പാദ്യം.

ഫോർബ്സ് മാസിക പുറത്തുവിട്ട കണക്കുകൾ അനുസരിച്ച് കഴിഞ്ഞ ഒരു വർഷത്തിനുള്ളിൽ 283 കോടി രൂപയാണ് ഒസാക്ക സമ്പാദിച്ചത്. സമ്മാനത്തുകകളും പരസ്യവരുമാനവും അടക്കമാണ് ഇത്. ലോകത്ത് ഏറ്റവും കൂടുതൽ പ്രതിഫലം വാങ്ങുന്ന 100 കായികതാരങ്ങളുടെ പട്ടികയിൽ 29-ാം സ്ഥാനത്താണ് ഒസാക്ക.

2018 യു എസ് ഓപ്പണിൽ സെറീനയെ തോൽപ്പിച്ച് കിരീടം നേടിയതോടെയാണ് ഒസാക്ക ശ്രദ്ധനേടിയത്. പിറ്റേവർഷം ഓസ്ട്രേലിയൻ ഓപ്പൺ കിരീടവും സ്വന്തമാക്കി. പിന്നീട് നിറംമങ്ങിയ താരം നിലവിൽ ലോകറാങ്കിങ്ങിൽ പത്താം സ്ഥാനത്താണ്.

ഏറ്റവും കൂടുതൽ പണം സമ്പാദിക്കുന്ന വനിതാ താരങ്ങളുടെ പട്ടിക ഫോർബ്സ് തയ്യാറാക്കാൻ തുടങ്ങിയപ്പോൾ മുതൽ ടെന്നീസ് താരങ്ങളാണ് എല്ലാ വർഷവും പട്ടികയിൽ മുന്നിലുള്ളത്. കഴിഞ്ഞ നാലു വർഷം ഏറ്റവും കൂടുതൽ പ്രതിഫലം വാങ്ങുന്ന വനിതാ താരം സെറീന വില്ല്യംസ് ആയിരുന്നു. അതിനു മുമ്പുള്ള അഞ്ചു വർഷവും ഈ പട്ടികയിൽ മരിയ ഷറപ്പോവ ആയിരുന്നു ഒന്നാമത്. 2015ലെ ഷറപ്പോവയുടെ 226 കോടി രൂപയുടെ റെക്കോഡ് ഒസാക്കയും സെറീനയും മറികടന്നു.