ന്യൂഡല്‍ഹി: എല്ലാം നമ്മളില്‍ നിന്നും എന്നന്നേക്കുമായി അകറ്റുന്നതല്ല ഗര്‍ഭധാരണം. ശാരീരികമായും മാനസീകമായും പ്രതിബന്ധം തീര്‍ക്കുകയല്ല. നമ്മെ ശക്തിപ്പെടുത്തുകയാണ്. അമ്മയാവാന്‍ തയ്യാറെടുക്കുന്ന ഇന്ത്യന്‍ ടെന്നീസ് താരം സാനിയാ മിര്‍സയാണ് ഗര്‍ഭധാരണം തീര്‍ക്കുന്ന ചങ്ങലക്കെട്ടുകളെ പൊട്ടിച്ചെറിയാന്‍ പറയുന്നത്.

ഗര്‍ഭധാരണം പല വഴികളില്‍ നമ്മെ ശക്തിപ്പെടുത്തുന്നു. നിങ്ങള്‍ എന്തായിരുന്നുവോ, എങ്ങിനെയായിരുന്നുവോ എന്നതിലൊന്നും മാറ്റമുണ്ടാവില്ല. ഭാഗ്യത്താലോ, നിര്‍ഭാഗ്യത്താലോ എന്റെ പ്രൊഫഷന് ഗര്‍ഭധാരണം ഒരു ഇടവേള നല്‍കി. കരിയറിന്റെ മികച്ച ഘട്ടത്തില്‍ നില്‍ക്കുമ്പോഴായിരുന്നു അത്. എന്നാല്‍ ശരിയായ സമയം ഏതെന്ന് നോക്കി തിരഞ്ഞെടുക്കുന്നതില്‍ അല്ല. ആ സമയം എന്താണ് നമുക്ക് അനുഭവപ്പെടുന്നത് എന്നതിലാണ് പ്രാധാന്യം. 

ഒരു ഒന്നര വര്‍ഷം മുന്‍പ് വരെ മാലിക്ക് എന്നോട് കുഞ്ഞിനെ കുറിച്ച് സംസാരിച്ചിരുന്നു. എന്നാല്‍ അമ്മയാവാന്‍ ഞാന്‍ തയ്യാറായിട്ടില്ലെന്നായിരുന്നു എന്റെ മറുപടി. പക്ഷേ കുറച്ചു മാസങ്ങള്‍ കൊണ്ട് തന്നെ എന്റെ ചിന്തയാകെ മാറി. ആ മാറ്റം എങ്ങിനെ സംഭവിച്ചു എന്നറിയില്ല. എന്നാല്‍ അമ്മയാവുക എന്നത് കൊണ്ട് നിങ്ങള്‍ എന്തായിരുന്നുവോ അത് നിങ്ങളില്‍ നിന്നും ഇല്ലാതാവുന്നില്ല എന്ന് തന്നെയാണ് ഞാന്‍ വിശ്വസിക്കുന്നതെന്ന് സാനിയ പറയുന്നു. 

കുറച്ച് മാസം നമ്മള്‍ ചില കാര്യങ്ങളില്‍ ത്യാഗം ചെയ്യേണ്ടി വരും. എന്നാല്‍ അമ്മയാകുന്നതിന് മുന്‍പ് വരെ ചെയ്തിരുന്ന കാര്യങ്ങള്‍ ഉപേക്ഷിക്കണം എന്ന് അതിന് അര്‍ഥമില്ല. അമ്മയാവാന്‍ പോകുന്നു എന്നത് വൈകല്യങ്ങളിലേക്ക് നമ്മെ നയിക്കുകയല്ലെന്ന് മനസിലാക്കണം. ഗര്‍ഭധാരണത്തിന് ശേഷം നമുക്കുള്ളിലുള്ള  ഒരുപാട് കാര്യങ്ങള്‍ തിരിച്ചറിയാന്‍ സാധിച്ചുവെന്ന് സാനിയ പറയുന്നു. 

കുഞ്ഞിന് ജന്മം നല്‍കുക എന്നതിലെ തീവ്രത പലപ്പോഴും നമുക്ക് മനസിലാവില്ല. മറ്റൊരു ജീവന് ജന്മം നല്‍കുകയാണ് നമ്മള്‍. ആ തിരിച്ചറിവ് സ്ത്രീ എന്ന നിലയില്‍ എന്നെ തന്നെ മനസിലാക്കാന്‍ സഹായിച്ചു. പെണ്ണിന്റെ ശക്തി നമുക്ക് മനസിലാവുക അപ്പോഴാണ്. ഗര്‍ഭധാരണത്തോടെ നമ്മുടെ ശരീരം അതിന് വേണ്ട രീതിയില്‍ മാറും. അത് സ്വാഭാവികമായി സംഭവിക്കുന്നതാണെന്ന് സ്ത്രീ മനസിലാക്കണം. 

അമ്മയാകാന്‍ ഒരുങ്ങുന്ന നാളുകളില്‍ മാലിക്ക് കൂടെ തന്നെയുണ്ട്. എന്നാല്‍ മറ്റുള്ളവരെ പോലെ ഞങ്ങള്‍ക്ക് കൂടുതല്‍ സമയം ഒരുമിച്ച് ലഭിക്കുന്നില്ല. കഴിഞ്ഞ കുറച്ച് മാസങ്ങളായി മാലിക്കിന്റെ അടുത്തേക്ക് ഞാന്‍ എപ്പോഴും പോയിരുന്നു. എന്നാലിപ്പോള്‍ അതിന് സാധിക്കുന്നില്ല. എന്നാല്‍ ഗര്‍ഭധാരണത്തിന്റെ ആദ്യ മാസങ്ങളില്‍ മാലിക്ക് നല്ല ക്ഷമ കാണിച്ചിരുന്നു. ആ സമയം എപ്പോഴും സ്വാഭാവം മാറിക്കൊണ്ടിരുന്നു എന്റെയെന്നും സാനിയ പറയുന്നു.