മാഡ്രിഡ്: സ്പാനിഷ് ലാ ലിഗയില്‍ ബാഴ്‌സലോണയുടെ കിരീട പ്രതീക്ഷകള്‍ക്ക് കഴിഞ്ഞ മത്സരത്തില്‍ തിരിച്ചടി നേരിട്ടിരുന്നു. സെല്‍റ്റ വിഗോയുമായുള്ള മത്സരത്തില്‍ സമനില പാലിക്കേണ്ടത് വന്നത് കറ്റാലന്‍ പടയ്ക്ക് ക്ഷീണമായി. തൊട്ടുപിന്നാലെ റയല്‍ മാഡ്രിഡ് എസ്പാന്യോളിനെ ഒറ്റ ഗോളിന് തകര്‍ത്ത് പട്ടികയില്‍ ഒന്നാം സ്ഥാനം അരക്കിട്ടുറപ്പിക്കുകയും ചെയ്തത് ബാഴ്‌സയ്ക്ക് ഇരട്ട പ്രഹരമായി.

32 മത്സരങ്ങളില്‍ നിന്ന് റയല്‍ മാഡ്രിഡിന് 71 പോയിന്റും ബാഴ്‌സലോണയ്ക്ക് 69 പോയിന്റുമായി. രണ്ട് പോയിന്റിന്റെ വ്യത്യാസമാണ് സിനദിന്‍ സിദാനും സംഘവും എസ്പാന്യോളിനെതിരായ വിജയത്തോടെ സ്വന്തമാക്കിയത്.

ഒറ്റ ഗോളിന്റെ നിര്‍ണായക വിജയമാണ് റയല്‍ കഴിഞ്ഞ ദിവസം സ്വന്തമാക്കിയത്. ആദ്യ പകുതിയുടെ ഇഞ്ച്വറി സമയത്ത് കാസമിറോയാണ് ഗോള്‍ വലയിലാക്കിയത്. ഈ ഗോളിലേക്ക് വഴിയൊരുക്കിയ ഫ്രഞ്ച് സ്‌ട്രൈക്കര്‍ കരിം ബെന്‍സെമയുടെ അസിസ്റ്റ് ശ്രദ്ധേയമായിരുന്നു.

ബോക്‌സിനകത്ത് നിന്ന് ബാക്ക്ഹീല്‍ പാസിലൂടെ ബെന്‍സെമ നല്‍കിയ കിറുകൃത്യം പാസ് ഒന്ന് വലയിലേക്ക് ഇടണ്ട ജോലി മാത്രമേ കാസമിറോയ്ക്കുണ്ടായിരുന്നുള്ളു. താരം അത് സുന്ദരമായി പൂര്‍ത്തിയാക്കുകയും ചെയ്തു. എസ്പാന്യോള്‍ പ്രതിരോധ താരത്തിന്റെ ഇരു കാലുകള്‍ക്കമുടയിലൂടെ പന്ത് കൈമാറിയാണ് ബെന്‍സെമ ഗോളിന് വഴിയൊരുക്കിയത്.