ലണ്ടന്‍: പന്തുകള്‍ പാഴാക്കുന്നതിന്റെ പേരില്‍ വിമര്‍ശനം നേരിടുന്നതിനിടെ, വിക്കറ്റ് കീപ്പര്‍ ബാറ്റ്‌സ്മാന്‍ എം എസ് ധോണിയെ പിന്തുണച്ച് നായകന്‍ വിരാട് കോഹ്‌ലി. ധോണിയെ ഇതിഹാസമെന്നാണ് വിരാട് കോഹ് ലി വിശേഷിപ്പിച്ചത്. അദ്ദേഹത്തിന്റെ അനുഭവസമ്പത്തും പ്രതികരണങ്ങളും ടീമിന് വിലമതിക്കാനാവാത്തതാണെന്നും കോഹ് ലി പറഞ്ഞു.

അഫ്ഗാനിസ്ഥാന്‍, വെസ്റ്റ് ഇന്‍സീഡ് എന്നി ടീമുകള്‍ക്കെതിരെയുളള ധോണിയുടെ പ്രകടനത്തില്‍  വിമര്‍ശനം ഉയര്‍ന്നിരുന്നു. അനാവശ്യമായി പന്തുക്കള്‍ പാഴാക്കുന്നു എന്നതാണ് വിമര്‍ശനം. സ്‌ട്രൈക്ക് കൃത്യമായ ഇടവേളകളില്‍ മാറുന്നതില്‍ അദ്ദേഹം പരാജയപ്പെടുന്നു എന്നതാണ് വിമര്‍ശനങ്ങളുടെ രത്‌നച്ചുരുക്കം. ധോണിക്കെതിരെ സച്ചിന്‍ ടെണ്ടുല്‍ക്കറും വി വി എസ് ലക്ഷ്മണും രംഗത്തുവന്നിരുന്നു. അതേസമയം ധോണിയെ പിന്തുണച്ച് സൗരവ് ഗാംഗുലി രംഗത്തുവന്നത് വലിയ വാര്‍ത്തയായിരുന്നു.ഈ പശ്ചാത്തലത്തിലാണ് തന്റെ സഹപ്രവര്‍ത്തകനെ പിന്തുണച്ച് വിരാട് കോഹ് ലിയും മുന്നോട്ടുവന്നത്.

മധ്യഓവറുകളില്‍ എന്താണ് ചെയ്യേണ്ടത് എന്ന് ധോണിക്ക് അറിയാം. എന്നാല്‍ ഒരു ദിവസം പ്രകടനം മോശമായാല്‍ ധോണിയെ എല്ലാവരും വിമര്‍ശിക്കാന്‍ തുടങ്ങും. എന്നാല്‍ തങ്ങള്‍ അദ്ദേഹത്തൊടൊപ്പമാണെന്ന്് കോഹ് ലി പറഞ്ഞു. ഒരുപാട് കളികളില്‍ അദ്ദേഹം ടീമിന് വിജയം നേടി കൊടുത്തിട്ടുണ്ടെന്നും കോഹ് ലി ഓര്‍മ്മിപ്പിച്ചു. വെസ്റ്റ് ഇന്‍ഡീസിനെതിരെ 125 റണ്‍സിന്റെ തകര്‍പ്പന്‍ വിജയം നേടിയതിന് പിന്നാലെ പ്രതികരിക്കുകയായിരുന്നു കോഹ് ലി.

വെസ്റ്റ് ഇന്‍ഡീസിനെതിരെ തുടക്കം മോശമായിരുന്നുവെങ്കിലും അവസാന ഓവറുകളില്‍ ധോണി മിന്നുന്ന പ്രകടനമാണ് പുറത്തെടുത്തത്. 61 പന്തില്‍ 56 റണ്‍സാണ് അദ്ദേഹം നേടിയത്. ഇതില്‍ അവസാന ഓവറില്‍ അദ്ദേഹം നേടിയ 16 റണ്‍സ് ടീമിന് വലിയ മുതല്‍ക്കൂട്ടായി.

പത്തിരുപത് റണ്‍സ് ആവശ്യമുളളപ്പോള്‍ ടീമിന് ധോണിയെ പോലുളള ഒരു താരമുണ്ടെന്നതാണ് ഏറ്റവും വലിയ കരുത്ത്. ഈ റണ്‍സ് എങ്ങനെ നേടാന്‍ കഴിയുമെന്ന് അദ്ദേഹത്തിന് അറിയാം. ധോണിയുടെ അനുഭവസമ്പത്ത് 10 ല്‍ എട്ടുതവണയും ഗുണം ചെയ്തിട്ടുണ്ട്. 260 ലധികം റണ്‍സ് നേടിയാല്‍ വെസ്റ്റ് ഇന്‍ഡീസിനെ പ്രതിരോധിക്കാന്‍ കഴിയുമെന്ന് അദ്ദേഹം ടീമിന് ആത്മവിശ്വാസം നല്‍കി.

മികച്ച ചുരുക്കം കളിക്കാരില്‍ ഒരാളാണ് അദ്ദേഹം. അതുകൊണ്ട് തന്നെ ധോണി ഇതിഹാസമാണെന്നും കോഹ് ലി പറഞ്ഞു. വെസ്റ്റ് ഇന്‍ഡീസിനെതിരായ മത്സരത്തില്‍ അവസാന ഓവറുകളില്‍ ധോണിക്ക് കൂട്ടായി നിന്ന് പോരാടിയ ഓള്‍റൗണ്ടര്‍ ഹാര്‍ദിക് പാണ്ഡ്യയെ അഭിനന്ദിക്കാനും കോഹ് ലി മറന്നില്ല. 38 പന്തില്‍ 46 റണ്‍സാണ് ഹാര്‍ദിക് ഇന്ത്യന്‍ ഇന്നിംഗ്‌സില്‍ കൂട്ടിച്ചേര്‍ത്തത്.