കൊച്ചി: ഒഡിഷയ്ക്കെതിരായ ഐഎസ്എൽ പോരാട്ടം ​ഗോൾരഹിത സമനിലയിൽ പിരിഞ്ഞതിന് പിന്നാലെ കേരളാ ബ്ലാസ്റ്റേഴ്സിനെതിരെ രൂക്ഷ വിമർശനവുമായി ഇതിഹാസ താരം ഐഎം വിജയൻ. കേരളത്തിന്റെ സന്തോഷ് ട്രോഫി ടീം ഇതിലും നന്നായി കളിക്കുമെന്ന് വിജയൻ പരിഹസിച്ചു. ആത്മാർത്ഥത ഇല്ലാത്ത ഈ ടീമിനെ മാറ്റി പുതിയ ടീമിനെ കൊണ്ടു വരണമെന്നും മുൻ ഇന്ത്യൻ താരം അഭിപ്രായപ്പെട്ടു.

സ്വന്തം മൈതാനത്തിലെ മൂന്ന് പോയിൻ്റ് നിർണായകമാണ്. അവർ സമനിലക്ക് വേണ്ടി കളിച്ചു. നമ്മൾ വിജയിക്കാൻ ശ്രമിക്കണമായിരുന്നു. കണ്ടിട്ടുള്ളതിൽ വെച്ച് ഏറ്റവും ബോറൻ കളികളിൽ ഒന്നാണ് കൊച്ചിയിൽ കണ്ടതെന്നും വിജയൻ പറഞ്ഞു. 

മുഹമ്മദ് റാഫിയെ കളിക്കിടെ പിൻവലിച്ചത് അദ്ദേഹത്തോടുള്ള അവഹേളനമാണെന്ന് വിജയൻ വ്യക്തമാക്കി. ആദ്യ പകുതിയിൽ ഇറക്കി രണ്ടാം പകുതിയിൽ വലിച്ചത് മോശമാണ്. ആദ്യമേ ഓഗ്ബച്ചെയെ ഇറക്കുന്നതായിരുന്നു ഇതിനെക്കാൾ നല്ലത്.  ഭൂരിഭാഗം സമയവും കാലിൽ പന്തു ചേർത്തു വെയ്ക്കുന്നതല്ല യഥാർത്ഥ ഫുട്ബോളെന്നും അദ്ദേഹം കൂട്ടിച്ചേർത്തു.