മുംബൈ ഇന്ത്യൻസിനെതിരായ മത്സരം സൂപ്പർ ഓവറിലേക്ക് കടന്നപ്പോൾ തനിക്ക് സമ്മർദമുണ്ടായിരുന്നില്ലെന്ന് ക്രിസ് ഗെയിൽ. ആ ഘട്ടത്തിൽ ദേഷ്യമുണ്ടായിരുന്നെന്നും താൻ അസ്വസ്ഥനായിരുന്നെന്നും ഗെയ്ല്‍ തുറന്നുപറഞ്ഞു. ഈ സ്ഥിതിയിൽ ടീമെത്തിയല്ലോ എന്നാലോചിച്ചായിരുന്നു തന്റെ ദുഃഖമെന്ന് താരം പറഞ്ഞു. മായങ്ക് അഗർവാളുമായുള്ള വീഡിയോ ഷോയിലാണ് ​ഗെയ്ല്‍ മനസ്സ് തുറന്നത്. 

"നേരത്തെ തന്നെ ജയിക്കാവുന്ന മത്സരമായിരുന്നു. എനിക്ക് യാതൊരു സമ്മർദമോ, ചാഞ്ചാട്ടമോ ഇല്ലായിരുന്നു. ശരിക്കും പറഞ്ഞാൽ എനിക്ക് ദേഷ്യമാണ് വന്നത്. വളരെ വിഷമത്തിലും നിരാശയിലുമായിരുന്നു ഞാൻ. ഈ സ്ഥിതിയിൽ ടീമെത്തിയല്ലോ എന്നാലോചിച്ചായിരുന്നു വിഷമം. പക്ഷേ ഇത് ക്രിക്കറാണ്. ഇത്തരം കാര്യങ്ങളൊക്കെ അതിൽ നടക്കുന്നതാണ്",  ഗെയ്ൽ പറഞ്ഞു.

ടീമിന്റെ ജയത്തിന് കാരണം മുഹമ്മദ് ഷമിയാണെന്നും ​ഗെയ്ല്‍ അഭിപ്രായപ്പെട്ടു. "ഞാൻ ഷമിയുടെ പന്ത് നെറ്റ്‌സിൽ കളിച്ചതാണ്. ആ യോർക്കറുകൾ ഗംഭീരമായി തന്നെ എറിയാൻ ഷമിക്ക് സാധിക്കുമെന്ന് എനിക്ക് ഉറപ്പായിരുന്നു. അത് കൃത്യമായി തന്നെ ഷമി ഉപയോഗിച്ചു. രോഹിത്തിനും ഡികോക്കിനുമെതിരെ ആറ് റൺസ് എറിഞ്ഞ് പിടിക്കുക എന്നത് ഗംഭീരമായ കാര്യമാണ്. കിടിലൻ ബൗളിംഗായിരുന്നു ഷമി കാഴ്ച്ചവെച്ചത്". മത്സരത്തിൽ പഞ്ചാബിനെ വിജയിപ്പിച്ചത് ആ ഓവർ ആണെന്നും ഗെയ്ൽ പറഞ്ഞു.