ദുബായ്: ന്യൂസിലന്‍ഡിനെതിരായ ടെസ്റ്റ് പരമ്പരയില്‍ നാണംകെട്ട തോല്‍വി ഏറ്റുവാങ്ങിയ ഇന്ത്യക്ക് അല്‍പ്പം ആശ്വാസം. ഐസിസിയുടെ ഏറ്റവും പുതിയ ടെസ്റ്റ് റാങ്കിങില്‍ ഇന്ത്യ ഒന്നാം സ്ഥാനം നിലനിര്‍ത്തി. ഫോമില്ലാതെ ഉഴലുന്ന വിരാട് കോഹ്‌ലിക്കും ആശ്വസിക്കാനുള്ള വകയുണ്ട്. ബാറ്റ്‌സ്മാന്‍മാരുടെ റാങ്കിങിലെ രണ്ടാം സ്ഥാനം കോഹ്‌ലിയും നിലനിര്‍ത്തി. 

116 റേറ്റിങ് പോയിന്റുകളുമായാണ് ഇന്ത്യ ഒന്നാം റാങ്ക് നിലനിര്‍ത്തിയത്. ആറ് പോയിന്റ് വ്യത്യാസത്തില്‍ ന്യൂസിലന്‍ഡ് 110 പോയിന്റുകളുമായി രണ്ടാം സ്ഥാനത്ത്. 108 പോയിന്റുമായി ഓസ്‌ട്രേലിയയാണ് മൂന്നാം സ്ഥാനത്ത്. 

ദിവസങ്ങള്‍ക്ക് മുന്‍പാണ് മുന്‍ ഓസ്‌ട്രേലിയന്‍ നായകന്‍ സ്റ്റീവന്‍ സ്മിത്ത് കോഹ്‌ലിയെ രണ്ടാം സ്ഥാനത്തേക്ക് പിന്തള്ളി ഒന്നാം റാങ്കിലേക്ക് കയറിയത്. അന്ന് രണ്ടാം സ്ഥാനത്തേക്കിറങ്ങിയ കോഹ്‌ലിക്ക് ഇത്തവണ മാറ്റമുണ്ടായില്ല. ന്യൂസിലന്‍ഡിനെതിരെ നാലിന്നിങ്‌സുകളില്‍ നിന്നായി കോഹ്‌ലി നേടിയത് കേവലം 38 റണ്‍സ് മാത്രം. സമീപ കാലത്തൊന്നും ഇത്രയും മോശം പ്രകടനം കോഹ്‌ലി പുറത്തെടുത്തിട്ടില്ല. 

ഇടവേളയ്ക്ക് ശേഷം ടീമില്‍ തിരിച്ചെത്തിയ യുവ താരം പൃഥ്വി ഷാ റാങ്കിങില്‍ നേട്ടമുണ്ടാക്കി. ഒറ്റയടിക്ക് 17 സ്ഥാനങ്ങളാണ് പൃഥ്വി കയറിയത്. 76ാം റാങ്കിലാണ് പൃഥ്വി.