ദുബായ്: സുശാന്ത് സിങ് രജപുത്തിന് ഹൃദയം തൊടുന്ന കുറിപ്പുമായി ഇന്ത്യന്‍ മുന്‍ ക്രിക്കറ്റ് താരം സുരേഷ് റെയ്‌ന. സുശാന്തിന് നീതി നേടിത്തരാന്‍ നമ്മുടെ ഭരണകൂടത്തിന് സാധിക്കുമെന്നാണ് വിശ്വസിക്കുന്നതെന്ന് റെയ്‌ന പറഞ്ഞു. 

ട്വിറ്ററില്‍ വീഡിയോ പങ്കുവെച്ചാണ് റെയ്‌നയുടെ പ്രതികരണം. നിങ്ങള്‍ എന്നും ഞങ്ങളുടെ മനസിലുണ്ടാവും. നിങ്ങളുടെ ആരാധകര്‍ മറ്റെന്തിനേക്കാളും കൂടുതല്‍ നിങ്ങളെ മിസ് ചെയ്യുന്നു. നമ്മുടെ ഭരണകൂടത്തിലും നേതാക്കളിലും എനിക്ക് പൂര്‍ണ വിശ്വാസമുണ്ട്. നിനക്ക് നീതി നേടിത്തരാന്‍ അവര്‍ എല്ലാ വഴിയും നോക്കും. യഥാര്‍ഥ പ്രചോദനമാണ് നീ, വീഡിയോ പങ്കുവെച്ച് റെയ്‌ന ട്വിറ്ററില്‍ കുറിച്ചു. 

ജൂണ്‍ 14ന് മുംബൈയിലെ ബാന്ദ്രയിലെ വസതിയിലാണ് സുശാന്തിനെ മരിച്ച നിലയില്‍ കണ്ടെത്തിയത്. ജൂലൈയില്‍ ബോളുവുഡ് താരം റിയ ചക്രവര്‍ത്തിക്കെതിരെ പാട്‌ന പൊലീസ് ആത്മഹത്യാപ്രേരണാ കുറ്റം ഉള്‍പ്പെടെയുള്ളവ ചുമത്തി കേസെടുത്തിരുന്നു. സുശാന്തിന്റെ പിതാവിന്റെ പരാതിയിലായിരുന്നു കേസ്. ഓഗസ്റ്റ് 19ന് സുപ്രീംകോടതി സിബിഐ അന്വേഷണത്തിന് ഉത്തരവിടുകയും ചെയ്തു.