മുംബൈ: ന്യൂസിലാന്ഡ് ക്രിക്കറ്റ് ടീമിന്റെ ഇന്ത്യയിലെ ലൈവ് സ്ട്രീമിങ് സംപ്രേഷണാവകാശം സ്വന്തമാക്കി ആമസോണ് പ്രൈം വീഡിയോ. ന്യൂസിലാന്ഡ് ക്രിക്കറ്റ് ബോര്ഡുമായി ആമസോണ് പ്രൈം കരാറിലെത്തി. പ്രധാനപ്പെട്ട ക്രിക്കറ്റ് ബോര്ഡുമായി കരാറില് എത്തുന്ന ആദ്യ ഇന്ത്യന് സ്ട്രീമിങ് സര്വീസ് ആണ് ആമസോണ് പ്രൈം.
ന്യൂസിലാന്ഡില് കളിക്കുന്ന വനിതാ, പുരുഷ ക്രിക്കറ്റ് ടീമുകളുടെ എല്ലാ ഫോര്മാറ്റിലെ മത്സരങ്ങളും ഇനി സംപ്രേഷണം ചെയ്യുക ആമസോണ് ആയിരിക്കും. 2021 മുതല് ആറ് വര്ഷത്തേക്കാണ് കരാര്. 2022ന്റെ തുടക്കത്തിലെ ഇന്ത്യയുടെ ന്യൂസിലാന്ഡ് പര്യടനം ഇതോടെ ആമസോണ് പ്രൈമില് കാണാം.
ഇന്ത്യയുടെ പ്രീയപ്പെട്ട കളിയുടെ സ്ട്രീമിങ് കൊണ്ടുവരാനാണ് ശ്രമിക്കുന്നത് എന്ന് ആമസോണ് പ്രൈം വീഡിയോ ഡയറക്ടര് ജനറല് മാനേജര് ഗൗരവ് ഗാന്ധി പറഞ്ഞു. കരുത്തരായ, അഭിനിവേശം നിറഞ്ഞ ക്രിക്കറ്റ് ടീമാണ് ന്യൂസിലാന്ഡിന്റേത്. ഇന്ത്യയും ന്യൂസിലാന്ഡും തമ്മിലുള്ള ക്രിക്കറ്റ് വൈര്യം വിസ്മയിപ്പിക്കുന്നതും. പ്രൈം മെമ്പേഴ്സിനെ സന്തോഷിപ്പിക്കുന്നതായിരിക്കും ഈ തീരുമാനം എന്നും അദ്ദേഹം പറഞ്ഞു.
പ്രീമിയര് ലീഗ്, എടിപി ടൂര്, ഡബ്ല്യുടിഎ, യുഎസ് ഓപ്പണ്, ചാമ്പ്യന്സ് ലീഗ് എന്നിങ്ങനെ ലോകത്തിന്റെ വിവിധ ഭാഗങ്ങളില് ലൈവ് ടെലികാസ്റ്റ് നടത്തുന്നതിന് ഒപ്പമാണ് ന്യൂസിലാന്ഡ് ക്രിക്കറ്റുമായും ആമസോണ് പ്രൈം കരാറില് എത്തുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates