സിഡ്‌നി: ഇംഗ്ലണ്ട് പര്യടനത്തിന് ഇടയില്‍ പന്തില്‍ വിയര്‍പ്പ് പുരട്ടരുത് എന്ന് ഓസീസ് താരങ്ങളോട് ക്രിക്കറ്റ് ഓസ്‌ട്രേലിയ. തലയില്‍ നിന്നും മുഖം, കഴുത്ത് എന്നിവിടങ്ങളില്‍ നിന്നുമുള്ള വിയര്‍പ്പ് പന്തില്‍ തിളക്കം വരുത്താന്‍ ഉപയോഗിക്കരുത് എന്നാണ് ക്രിക്കറ്റ് ഓസ്‌ട്രേലിയ നിര്‍ദേശിച്ചിരിക്കുന്നത്.
നേരത്തെ കോവിഡിന്റെ പശ്ചാത്തലത്തില്‍ പന്തില്‍ ഉമിനീര് പുരട്ടുന്നത് ഐസിസി വിലക്കിയിരുന്നു. എന്നാല്‍ ശരീരത്തിലെ വിയര്‍പ്പ് ഇതിനായി ഉപയോഗിക്കാന്‍ അനുവദിച്ചു. എന്നാല്‍ കോവിഡ് ഉയര്‍ത്തുന്ന വെല്ലുവിളികളില്‍ മുന്‍കരുതല്‍ എന്ന നിലയില്‍ വിയര്‍പ്പും ഉപയോഗിക്കേണ്ടതില്ല എന്നാണ് ക്രിക്കറ്റ് ഓസ്‌ട്രേലിയ നല്‍കുന്ന നിര്‍ദേശം.
സെപ്തംബര്‍ നാലിനാണ് ഇംഗ്ലണ്ടിനെതിരായ ഓസ്‌ട്രേലിയയുടെ പര്യടനം ആരംഭിക്കുന്നത്. വിയര്‍പ്പ് ഉപയോഗിക്കുന്നതിലെ വിലക്ക് വൈറ്റ് ബോള്‍ ക്രിക്കറ്റില്‍ വലിയ വെല്ലുവിളി സൃഷ്ടിക്കില്ലെന്നാണ് ഓസീസ് പേസര്‍ മിച്ചല്‍ സ്റ്റാര്‍ക്ക് പറയുന്നത്. എന്നാല്‍ റെഡ് ബോള്‍ ക്രിക്കറ്റില്‍ അതൊരു പ്രശ്‌നമാണ്. പരിശീലന മത്സരങ്ങളില്‍ വിയര്‍പ്പ് ഉപയോഗിക്കാതെ കളിക്കുമ്പോള്‍ എങ്ങനെ പന്ത് പെരുമാറുന്നു എന്ന് നോക്കി പ്ലാന്‍ തയ്യാറാക്കുമെന്നും സ്റ്റാര്‍ക്ക് പറഞ്ഞു.
വെസ്റ്റ് ഇന്‍ഡീസിനും പാകിസ്ഥാനും എതിരായ പരമ്പരകളില്‍ ഇംഗ്ലണ്ട് കളിക്കാര്‍ നെറ്റിയിലേയും മുതുകിലേയും വിയര്‍പ്പ് പന്തില്‍ തിളക്കം കൂട്ടുന്നതിനായി ഉപയോഗിച്ചിരുന്നു. കോവിഡ് ഭീഷണി ഒഴിഞ്ഞില്ലെങ്കില്‍ ഓസ്‌ട്രേലിയയുടെ ഹോം സീസണിലും സമാനമായ നിയന്ത്രണങ്ങള്‍ തുടരുമെന്നും സ്റ്റാര്‍ക് പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates