ഇത്തവണത്തെ കളികാലം അവസാനിച്ചു. ഇനി സ്വകാര്യമാണ്. സൂപ്പര്‍ താരം ലയണല്‍ മെസ്സിയുടെ കാര്യമാണ് പറയുന്നത്. സ്വകാര്യം എന്നുദ്ധേശിച്ചത് മറ്റൊന്നുമല്ല. വിവാഹമാണ്. അതെ, മെസ്സിയുടെ വിവാഹമാണ് ജൂണ്‍ 30ന്. അര്‍ജന്റീനയില്‍ റൊസാരിയോയിയില്‍ വെച്ചാണ് വിവാഹം. വധു ആരാണെന്നല്ലേ. ആന്റനെല്ലാ റൊക്കൂസ. അതെ, പത്ത് വര്‍ഷമായി ഒപ്പം താമസിക്കുന്ന കാമുകിയും നാലു വയസുകാരന്‍ തിയോയുടെയും ഒരു വയസുകാരന്‍ മാറ്റിയോയുടെയും അമ്മ റോക്കൂസോ തന്നെ!
ക്യൂട്ട് കപ്പിള്‍സ്
വളര്‍ന്നത് ബാഴ്‌സലോണയിലാണെങ്കിലും ജനിച്ച നഗരമായ റോസാരിയോയില്‍ വെച്ച് വിവാഹിതരാകാനാണ് ഇരുവരും തീരുമാനിച്ചത്. ലോകത്തിലെ ഏറ്റവും മികച്ച ഫുട്‌ബോള്‍ താരങ്ങളിലൊരാളായ തങ്ങളുടെ മെസ്സിയുടെ വിവാഹം ലാറ്റിനമേരിക്കയുടെ ഉത്സവമാക്കാനുള്ള ഒരുക്കത്തിലാണ് റൊസാരിയോ നഗരം.
2008 മുതല്‍ ഒരുമിച്ച് താമസിക്കുന്ന മെസ്സിയുടെ ബാല്യകാല സഖി കൂടിയാണ് റോക്കുസോ. അര്‍ജന്റീനിയന്‍ മോഡലിംഗ് രംഗത്ത് പ്രശസ്തയായ റൊക്കൂസോ തമ്മില്‍ കണ്ടുമുട്ടിയതും അടുത്തതുമെല്ലാം മെസിയുടെ കൂട്ടുകാരനും റുക്കോസോയുടെ ബന്ധുവുമായ ലൂകാസ് ഷാഗ്‌ളിയയിലൂടെയായിരുന്നു.
ജൂണ്‍ 24നു 30 വയസു തികയുന്ന മെസ്സിയും റൊക്കൂസോയും റൊസാരിയോയിലെ കത്തീഡ്രലായ അവര്‍ ലേഡി ഓഫ് റോസറിയില്‍ വെച്ചായിരിക്കും വിവാഹിതരാവുകയെന്നാണ് റിപ്പോര്‍ട്ടുകള്‍.
അതിഥികള്‍
കൊളംബിയന്‍ പോപ്പ് താരം ഷാക്കിറ, ഭര്‍ത്താവും ബാഴ്‌സലോണയില്‍ മെസ്സിയുടെ സഹതാരവുമായ ജെറാര്‍ഡ് പിക്വ, ലൂയിസ് സുവാരസ്, നെയ്മര്‍, സെസ്‌ക്ക് ഫാബ്രിഗാസ്, സാവി തുടങ്ങിയ പ്രമുഖ താരങ്ങള്‍ വിവാഹത്തിനെത്തുമെന്നാണ് റിപ്പോര്‍ട്ടുകള്‍. മാഞ്ചസ്റ്റര്‍ സിറ്റി താരം സെര്‍ജിയോ അഗ്യൂറോ, ഭാര്യയും അര്‍ജന്റീന പാട്ടുകാരിയുമായ കരീനയും ചടങ്ങിലെത്തും. കരീനയുടെ പാട്ടുമുണ്ടാകും ചടങ്ങില്‍.
ഏകദേശം 600 അതിഥികള്‍ ചടങ്ങിനെത്തുമെന്നാണ് ചില മാധ്യമങ്ങള്‍ റിപ്പോര്‍ട്ട് ചെയ്യുന്നത്. അര്‍ജന്റീന പ്രസിഡന്റ് മൗരിസിയോ മാക്‌രിയുടെ അടുത്ത സുഹൃത്തിന്റെ ഭാര്യ ബാര്‍ബറ ഡിയസാണ് വെഡിംഗ് പ്ലാനര്‍.
സ്പാനിഷ് ഡിസൈനര്‍ ഡ്രസ്
സ്പാനിഷ് ഫാഷന്‍ ഡിസൈനറായ റോസ ക്ലാര രൂപകല്‍പ്പന ചെയ്ത വസ്ത്രങ്ങളായിരിക്കും വിവാഹ ദിനത്തില്‍ താരങ്ങള്‍ അണിയുക. അതിഥികള്‍ക്ക് മാത്രമായി ഏകദേശം 20 ഓളം ഹെയര്‍ഡ്രസേഴ്‌സിനെയും ഏല്‍പ്പിച്ചിട്ടുണ്ട്.
വിവാഹ സമ്മാനം
വിവാഹ സമ്മാനമായി ആരും വീട്ടിലേക്ക് ഒന്നും കൊണ്ടുവരേണ്ടെന്നാണ് മെസ്സിയും റൊക്കൂസോയും അറിയിച്ചിട്ടുള്ളത്. ഇതിന് പകരമായി ലിയോ മെസ്സി ഫൗണ്ടേഷനിലേക്ക് സംഭാവന നല്‍കിയാല്‍ മതിയെന്നാണ് അതിഥികളോട് അറിയിച്ചിട്ടുള്ളത്. നിര്‍ധനരായ കുട്ടികളുടെ വിദ്യാഭ്യാസം, ആരോഗ്യം, കായികം എന്നിവ നടത്തുന്ന ചാരിറ്റി ഫൗണ്ടേഷനാണിത്.
സത്യത്തില്‍ ഷാക്കിറ എത്തുമോ
ഷാക്കിറയും റൊക്കൂസയും തമ്മില്‍ അത്ര ചേര്‍ച്ചയിലല്ല. പിക്വയുടെ മുന്‍ കാമുകി നൂരിയ തോമസിന്റെ അടുത്ത സുഹൃത്താണ് റൊക്കൂസോ. ഇവര്‍ തമ്മിലുള്ള പടലപ്പിണക്കങ്ങള്‍ ഇതിനോടകം തന്നെ നിരവധി തവണ വാര്‍ത്തായായിരുന്നു.
എന്നാലും, മെസ്സിയും പിക്വയും തമ്മിലുള്ള ബന്ധം കരുതി വിവാഹത്തിന് എന്തായാലും പോകുമെന്നാണ് ഷാക്കിറ പറയുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates