കണ്ണൂര്‍: മകന്റെ ജനന സര്‍ട്ടിഫിക്കറ്റില്‍ മതത്തിന്റെ കോളം ഒഴിച്ചിട്ടായിരുന്നു വിനീത് ഫുട്‌ബോള്‍ പ്രേമത്തിന് പുറത്ത് നില്‍ക്കുന്നവരുടേയും കയ്യടി നേടിയത്. മതമില്ലാതെ അവന്‍ വളരട്ടെ, വളര്‍ന്നിട്ട് അവന്‍ തീരുമാനിക്കട്ടെയെന്ന വിനീതിന്റെ നിലപാടിന് വലിയ പിന്തുണ ലഭിച്ചതിന് പിന്നാലെ മതത്തിന്റെ ചങ്ങലക്കെട്ടില്ലാതെ വളരുന്ന മകനിട്ട പേര് പുറത്തുവിടുകയാണ് വിനീത്. 

ഇടംകാലോ, വലതോ? അവന്‍ ഒരുങ്ങി കഴിഞ്ഞു, ഏദന്‍ സ്റ്റീവ്! എന്നാണ് വിനീത് ഫേസ്ബുക്കിലൂടെ പറയുന്നത്. കുഞ്ഞിക്കാലിനിടയിലെ കുഞ്ഞു ഫുട്‌ബോള്‍ കൊണ്ട് കളിക്കുന്ന വീഡിയോയും ഷെയര്‍ ചെയ്താണ് വിനീത് മകന്റെ പേര് പ്രഖ്യാപിക്കുന്നത്. 

ഏദന്‍ സ്റ്റീവ് എന്ന പേരില്‍ മതമുണ്ടാകില്ല, പക്ഷേ ഫുട്‌ബോള്‍ ഇല്ലാതെ വരില്ലല്ലോ...തന്റെ ഇഷ്ട താരങ്ങളായ ഏദന്‍ ഹസാര്‍ഡിന്റേയും, സ്റ്റീഫന്‍ ജെറാള്‍ഡിന്റേയും പേരുകള്‍ ചേര്‍ത്താണ് വിനീത് മകന് പേര് കണ്ടെത്തിയത്.