കൊച്ചി: കേരള ബ്ലാസ്റ്റേഴ്സിന്റെ കളി ഇനി കോഴിക്കോടും. അടുത്ത സീസണ്‍ മുതല്‍ ബ്ലാസ്റ്റേഴ്സിന്റെ മത്സരങ്ങള്‍ കോഴിക്കോട് ഇഎംഎസ് കോര്‍പ്പറേഷന്‍ സ്റ്റേഡിയത്തിലും നടക്കും. കോഴിക്കോട് കോര്‍പ്പറേഷന്‍ സ്റ്റേഡിയം ബ്ലാസ്റ്റേഴ്‌സിന് ഹോം മൈതാനമായി നല്‍കാന്‍ കോര്‍പ്പറേഷന്‍ തീരുമാനിച്ചതായാണ് സൂചന.
പ്രദീപ് കുമാര്‍ എംഎല്‍എ, കോഴിക്കോട് മേയര്‍ തോട്ടത്തില്‍ രവീന്ദ്രന്‍, കോഴിക്കോട് ജില്ലാ ഫുട്‌ബോള്‍ അസോസിയേഷന്‍ ഭാരവാഹികള്‍, കേരള ബ്ലാസ്റ്റേഴ്സ് ടീം പ്രതിനിധികള്‍ എന്നിവര്‍ നടത്തിയ ചര്‍ച്ചയിലാണ് ബ്ലാസ്റ്റേഴ്സിന്റെ കളി കോഴിക്കോട്ടേക്കും എത്തിക്കാന്‍ തീരുമാനമായത്.
എന്നാല്‍ പ്രീസീസണ്‍ സൗഹൃദ മത്സരങ്ങളും, ആരാധകരെ സംഘടിപ്പിച്ചുള്ള പരിപാടികളും മാത്രമാവും കോഴിക്കോട് കോര്‍പ്പറേഷന്‍ സ്റ്റേഡിയത്തില്‍ നടക്കുക എന്നും, കൊച്ചി തന്നെ ബ്ലാസ്റ്റേഴ്സിന്റെ ഹോം ഗ്രൗണ്ടായി തുടരുക എന്നുമാണ്
ഗോള്‍ റിപ്പോര്‍ട്ട് ചെയ്യുന്നത്. ഐ ലീഗ് ക്ലബ് ഗോകുലം എഫ്‌സിയുടെ ഹോം ഗ്രൗണ്ടാണ് കോഴിക്കോട് കോര്‍പ്പറേഷന്‍ സ്റ്റേഡിയം. കേരള ബ്ലാസ്റ്റേഴ്സ് ഇവിടേക്ക് എത്തുന്നതിനോട് ഗോകുലം എഫ്‌സി ഇതുവരെ പ്രതികരിച്ചിട്ടില്ല. ഗോകുലത്തിന്റെ ഓഫീസ് പ്രവര്‍ത്തിക്കുന്നതും ഇഎംഎസ് സ്റ്റേഡിയത്തിലാണ്. അടുത്ത സീസണിലേക്ക് സ്റ്റേഡിയം ലഭിക്കുന്നതിന് കരാര്‍ പുതുക്കണം എന്ന് കോഴിക്കോട് കോര്‍പ്പറേഷനോട് ഗോകുലം കേരള ആവശ്യപ്പെട്ടിട്ടുണ്ട്. കഴിഞ്ഞ മൂന്ന് വര്‍ഷമായി കോഴിക്കോട് കോര്‍പ്പറേഷന്‍ സ്റ്റേഡിയമാണ് ഗോകുലം കേരളയുടെ ഹോം ഗ്രൗണ്ട്.
സീസണ്‍ ആരംഭിക്കുന്നതിന് മുന്‍പ് ഗ്രൗണ്ട് നവീകരിക്കും. ഇതിന് വേണ്ട എസ്റ്റിമേറ്റ് തയ്യാറാക്കാന്‍ കോഴിക്കോട് കോര്‍പ്പറേഷന്‍ കേരള ബ്ലാസ്റ്റേഴ്‌സിനെ ചുമതലപ്പെടുത്തി. മെയ് 10ന് ഇക്കാര്യങ്ങള്‍ ചര്‍ത്ത ചെയ്യാന്‍ മേയര്‍ യോഗം വിളിച്ചിട്ടുണ്ട്. ഗ്രൗണ്ടിലെ ഫഌ്‌ലൈറ്റ് അപ്‌ഡേഷന്‍, ഗ്രൗണ്ടിലും പവലിയനിലും സിസിടിവി, ഗ്രൗണ്ടില്‍ മഴ വെള്ളം ഒഴിഞ്ഞു പോവുന്നതിന് ആവശ്യമായ ക്രമീകരണങ്ങള്‍ നടത്തുക എന്നിവയാണ് സീസണ്‍ ആരംഭിക്കുന്നതിന് മുന്‍പ് പൂര്‍ത്തിയാക്കുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates