കൊല്‍ക്കത്ത: പശ്ചിമ ബംഗാളിന്റെ ഒന്നാം നമ്പര്‍ ബാഡ്മിന്റണ്‍ താരമായ ത്രിനാങ്കുര്‍ നാഗ് (26) ഷോക്കേറ്റ് മരിച്ചു. റെയില്‍വേ ഷെഡിലെ ജോലിക്കിടയില്‍ അബദ്ധത്തില്‍ വൈദ്യുതലൈനില്‍ തട്ടിയാണ് അപകടമുണ്ടായത്. 

 ഉയര്‍ന്ന അളവില്‍ വൈദ്യുതി കടന്നുപോകുന്ന ലൈനില്‍ തട്ടിയതോടെ ഗുരുതരമായി പൊള്ളലേറ്റ് നാഗ് തെറിച്ച് വീഴുകയായിരുന്നുവെന്ന് ഈസ്റ്റേണ്‍ റെയില്‍വേ വക്താവ് അറിയിച്ചു.

പൊള്ളലേറ്റ നാഗിനെ റെയില്‍വേയുടെ ബി ആര്‍ സിങ് ആശുപത്രിയില്‍ പ്രവേശിപ്പിച്ചുവെങ്കിലും ജീവന്‍ രക്ഷിക്കാനായില്ല. റെയില്‍വേ ഉദ്യോഗസ്ഥരുടെ ഭാഗത്ത് നിന്നുണ്ടായ വീഴ്ചയാണ് അപകട കാരണമെങ്കില്‍ ഗുരുതരമായ ശിക്ഷയുണ്ടാകുമെന്ന് അധികൃതര്‍ വ്യക്തമാക്കി.  അഞ്ച് വര്‍ഷം മുമ്പാണ് നാഗ് റെയില്‍ വേയില്‍ ജോലി ലഭിച്ചെത്തിയത്.