ലണ്ടന്‍: റോജര്‍ ഫെഡറര്‍ക്ക് പിന്നാലെ സ്വിറ്റ്‌സര്‍ലന്‍ഡിന്റെ സ്റ്റാനിസ്ലാസ് വാവ്‌റിങ്കയും വിംബിള്‍ഡണ്‍ ടെന്നീസിന് വിജയത്തോടെ തുടക്കമിട്ടു. നാല് സെറ്റ് നീണ്ട ത്രില്ലര്‍ പോരാട്ടത്തില്‍ ബള്‍ഗേറിയന്‍ താരം ഗ്രിഗര്‍ ദിമിത്രോവിനെയാണ് വാവ്‌റിങ്ക വീഴ്ത്തിയത്. സ്‌കോര്‍: 1-6, 7-6 (7-3), 7-6 (7-5), 6-4. 
വനിതാ വിഭാഗത്തില്‍ അമേരിക്കന്‍ ഇതിഹാസം സെറീന വില്ല്യംസ് ആദ്യ റൗണ്ടില്‍ അനായാസ വിജയം സ്വന്തമാക്കി. ഹോളണ്ട് താരം അരന്‍സ്‌ക റുസിനെയെയാണ് സെറീന ഒന്നാം റൗണ്ടില്‍ കീഴടക്കിയത്. സ്‌കോര്‍: 7-5, 6-3.
സെറീനയുടെ സഹോദരി വീനസ് വില്ല്യംസും ആദ്യ റൗണ്ട് അനായാസം കടന്നു. സ്വീഡന്റെ ജൊഹന്ന ലാര്‍സനെയാണ് വീനസ് മറികടന്നത്. ടൈബ്രേക്കറിലേക്ക് നീണ്ട ആദ്യ സെറ്റ് കൈവിട്ട ശേഷമാണ് വീനസ് വിജയിച്ചത്. സ്‌കോര്‍: 6-7 (3-7), 6-2, 6-1.
ലോക ഒന്നാം നമ്പര്‍ വനിതാ താരം റൊമാനിയയുടെ സിമോണെ ഹാലെപ് ഇന്ന് ആദ്യ റൗണ്ടിനായി കളത്തിലെത്തും. ജപ്പാന്‍ താരം കുറുമി നരയാണ് ഹാലെപിന്റെ എതിരാളി.