മുംബൈ: ഇന്ത്യന്‍ ടീമിനെ നയിച്ചിരുന്ന സമയം ഫോണില്‍ സംസാരിക്കാന്‍ ധോനി തയ്യാറായിരുന്നില്ലെന്നാണ് ക്രിക്കറ്റ് ലോകത്തെ സംസാരം. എന്നാല്‍ കളിയില്‍ നിന്ന് വിരമിച്ചതിന് ശേഷം ഫോണ്‍ റിങ് ചെയ്ത് മുഴുവനാവുന്നതിന് മുന്‍പ് താന്‍ കോളുകള്‍ എടുക്കും എന്ന് ധോനി ഉറപ്പ് പറഞ്ഞതായി ആര്‍ പി സിങ് പറയുന്നു.
ഫോണ്‍ കോളുകള്‍ എടുക്കാത്തതിന് ധോനിയോട് ഞങ്ങള്‍ പരാതി പറഞ്ഞിട്ടുണ്ട്. അങ്ങനെ പറഞ്ഞപ്പോഴാണ് ഒരിക്കല്‍ എനിക്കും മുനാഫ് പട്ടേലിനും ധോനി ഈ ഉറപ്പ് നല്‍കിയത്. ഇനി ധോനിയുടെ ഫോണിലേക്ക് വിളിച്ച് പരീക്ഷിക്കണം എന്നും ആര്‍ പി സിങ് പറയുന്നു.
കളിയുടെ ചരിത്രം എടുത്താല്‍ ധോനിയെ പോലൊരു താരത്തെ വേറെ കണ്ടെത്താനാവില്ലെന്നും ആര്‍ പി സിങ് പറയുന്നു. ആ ബാറ്റിങ് പൊസിഷനില്‍ ഇറങ്ങിയാണ് ധോനി ഇന്ത്യയെ ഇത്രയും മത്സരങ്ങളില്‍ ജയിപ്പിച്ചത്. കളി ഫിനിഷ് ചെയ്യുന്ന മൈക്കല്‍ ബെവനെ കുറിച്ചെല്ലാം നമുക്കറിയാം. പക്ഷേ ധോനി അതിനെല്ലാം മുകളിലാണെന്നും ഇന്ത്യന്‍ മുന്‍ പേസര്‍ പറയുന്നു.
ഓഗസ്റ്റ് 15ന് വിരമിക്കല്‍ പ്രഖ്യാപനം നടത്തിയ ധോനി ഇപ്പോള്‍ ഐപിഎല്ലിനായി ദുബായിലാണ്. വിരമിക്കല്‍ മുറവിളിയുടെ സമ്മര്‍ദ്ദമില്ലാതെ ഐപിഎല്ലില്‍ കളിക്കുന്ന ധോനിക്ക് മികവ് കാണിക്കാനാവുമെന്നാണ് ആരാധകരുടെ കണക്കു കൂട്ടല്‍. കോവിഡിനെ തുടര്‍ന്ന് ട്വന്റി20 ലോകകപ്പ് മാറ്റി വെച്ചതോടെയാണ് ധോനി വിരമിക്കല്‍ തീരുമാനം ഉറപ്പിച്ചത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates