ഇന്ത്യന്‍ ക്രിക്കറ്റ് താരം രവീന്ദ്ര ജഡേജയെ വിടാതെ പിടികൂടിയിരിക്കുകയാണ് ട്രോളന്മാര്‍. ഒന്നിന് പിറകെ ഒന്നായി വിവാദങ്ങള്‍ അദ്ദേഹത്തെ തേടിയെത്തിക്കൊണ്ടിരിക്കുകയാണ്. മുന്‍പത്തെപ്പോലെ ഇത്തവണയും ട്രോളാനുള്ള ആയുധം ജഡേജ തന്നെയാണ് ആരാധകര്‍ക്ക് നല്‍കിയിരിക്കുന്നത്. അദ്ദേഹം തന്റെ ഇന്‍സ്റ്റഗ്രാമില്‍ പോസ്റ്റ് ചെയ്ത ഹുക്ക വലിച്ചുകൊണ്ടിരിക്കുന്ന ഫോട്ടോയാണ് പുതിയ വിവാദങ്ങള്‍ക്ക് വഴിവെച്ചിരിക്കുന്നത്.

യുവാക്കളുടെ ആരാധനാ പാത്രമായ ഒരാള്‍ പുകവലിയെ പ്രോത്സാഹിപ്പിക്കുന്ന ഖേദകരമാണെന്നാണ് സോഷ്യല്‍ മീഡിയയുടെ അഭിപ്രായം. ക്യാപ്റ്റന്‍ കൊഹ് ലി ഇത് കാണുന്നുണ്ടാകുമെന്ന് പറഞ്ഞും ഭീഷണിപ്പെടുത്തുന്നുമുണ്ട് ആരാധകര്‍. ഇത്തരം ഫോട്ടോ പ്രതിച്ഛായ തകര്‍ക്കുമെന്നും ഇന്ത്യന്‍ ടീമില്‍ നിന്ന് ബിസിസിഐ പുറത്താക്കാന്‍ വരെ ഇത് കാരണമാകുമെന്നും പറഞ്ഞുകൊണ്ടുള്ള നിരവധി കമന്റുകളാണ് വരുന്നത്. 

കഴിഞ്ഞ ആഴ്ച ആരാധകന്‍ അജയ് എന്ന് വിളിച്ചതിന് ട്വിറ്ററിലൂടെ ജഡേജ നീരസം പ്രകടിപ്പിച്ചതും വിവാദമായിരുന്നു. ഒന്‍പത് വര്‍ഷമായി ഇന്ത്യന്‍ ടീമിലുണ്ടായിരുന്നിട്ടും ജനങ്ങള്‍ തന്റെ പേര് ഓര്‍മിക്കുന്നില്ലെന്നാണ് അദ്ദേഹം പറഞ്ഞത്. എന്നാല്‍ ഇതിനെതിരേ നിരവധി പേരാണ് രംഗത്തെത്തിയത്.