വെസ്റ്റിൻഡീസിനെതിരായ ടെസ്റ്റ് പരമ്പരയ്ക്കുള്ള ഇന്ത്യൻ ടീമിലേക്ക് രോഹിത് ശർമയെ പരി​ഗണിക്കാത്ത സെലക്ടർമാരുടെ നടപടി വിമർശിക്കപ്പെടുകയാണിപ്പോൾ. മുൻ ക്യാപ്റ്റൻ സൗരവ് ​ഗാം​ഗുലി ട്വിറ്ററിലൂടെ തന്റെ വിയോജിപ്പ് പരസ്യമായി പ്രകടിപ്പിച്ചിരുന്നു. പിന്നാലെയിതാ മുൻ സ്പിന്നർ ഹർഭജൻ സിങ് സെലക്ടർമാരുടെ തീരുമാനത്തെ ചോദ്യം ചെയ്ത് രം​ഗത്തെത്തിയിരിക്കുന്നു. ഏഷ്യാ കപ്പിൽ മികച്ച പ്രകടനം നടത്തിയിട്ടും രോഹിതിനെ ടെസ്റ്റ് ടീമിലേക്ക് പരി​ഗണിക്കാത്തത് ആരാധക രോഷത്തിനും കാരണമായിട്ടുണ്ട്. 

സത്യത്തിൽ ഈ സെലക്ടർമാർ എന്താണ് ചിന്തിക്കുന്നതെന്ന് തനിക്ക് പിടികിട്ടുന്നില്ലെന്ന് ഭാജി പ്രതികരിച്ചു. ആർക്കെങ്കിലും മനസിലായിട്ടുണ്ടെങ്കിൽ പറഞ്ഞു തരാനും ടർബനേറ്റർ കുറിപ്പിൽ പറയുന്നു. 

‘വെസ്റ്റിൻഡീസിനെതിരായ ടെസ്റ്റ് ടീമിൽ രോഹിത് ശർമ ഇല്ല. സത്യത്തിൽ ഈ സെലക്ടർമാർ എന്താണു ചിന്തിക്കുന്നത്? ആർക്കെങ്കിലും വല്ല പിടിയുമുണ്ടോ? എനിക്കിത് ഒട്ടും മനസിലാകുന്നില്ല. ആർക്കെങ്കിലും മനസ്സിലായെങ്കിൽ ഒന്നു പറഞ്ഞു തരാമോ?’

രോഹിതിനെ തഴഞ്ഞതിൽ കടുത്ത വിമർശനമുയർത്തി ആരാധകരും സമൂഹ മാധ്യമങ്ങളിലൂടെ രംഗത്തെത്തിയിട്ടുണ്ട്. തുടർച്ചയായി ടീമിൽ നിന്ന് തഴഞ്ഞാണ് രേ​ഹിതിന്റെ ടെസ്റ്റ് കരിയർ സെലക്ടർമാർ നശിപ്പിച്ചതെന്ന് ചിലർ കുറിച്ചു. ഇപ്പോഴത്തെ ഫോമിൽ രോഹിത് ടെസ്റ്റ് ടീമിൽ ഇടം നേടാൻ യോഗ്യനായിരുന്നുവെന്നും ആരാധകർ ചൂണ്ടിക്കാട്ടുന്നു.