ഫേസ്ബുക്ക് ഉള്‍പ്പെടെയുള്ള സമൂഹമാധ്യമങ്ങളിലൂടെ പ്രളയ ദുരിതത്തില്‍ സ്വന്തം നാട്ടുകാര്‍ക്കായി കൈത്താങ്ങ് തേടി അനസ് എടത്തൊടിക്കയെ കാണില്ല. അനസിനെ കാണണം എങ്കില്‍ പ്രളയം പരന്നൊഴുകിയ മലപ്പുറം ജില്ലയിലെ വീടുകളുടെ ശുചീകരണ യജ്ഞത്തില്‍ ഏര്‍പ്പെട്ടവരിലേക്ക് നോക്കണം. ക്യാമറയ്ക്ക് പോലും മുഖം കൊടുക്കാതെ ദുരിതം അനുഭവിക്കുന്നവര്‍ക്കൊപ്പം നില്‍ക്കുകയാണ് ഇന്ത്യന്‍ പ്രതിരോധ നിര താരം. 

മലപ്പുറം ജില്ലയിലെ വാഴക്കാട് വാലിപ്പുഴ, പരപ്പത്ത് എന്നീ പ്രദേശങ്ങളിലാണ് അനസ് ശുചീകരണ പ്രവര്‍ത്തനങ്ങള്‍ക്ക് ഒപ്പം കൂടിയത്. ദേഹത്താകെ ചെളിയും അഴുക്കുമായി നില്‍ക്കുന്ന അനസിനെ ക്യാമറയിലാക്കാന്‍ പ്രദേശവാസികള്‍ ശ്രമിക്കുമ്പോഴും മുഖം കൊടുക്കാതെ ഒഴിഞ്ഞുമാറുകയാണ് അനസ്. 

വീട് വൃത്തിയാക്കാന്‍ ഇറങ്ങിയ അനസിന്റെ ഫോട്ടോയും വീഡിയോയും ഇന്ത്യന്‍ ഫുട്‌ബോള്‍ പ്രേമികള്‍ക്കിടയില്‍ വൈറലായി കഴിഞ്ഞു.