സാഫ് കപ്പില്‍ നിലവിലെ ചാമ്പ്യന്മാരായ ഇന്ത്യയ്ക്ക് വിജയ തുടക്കം.മലയാളി താരം ആഷിഖിന്റേയും ലാലിയന്‍സ്വലയുടേയും ഗോളുകളിലൂടെ ലങ്കയെ തകര്‍ത്താണ് ഇന്ത്യ കിരീടത്തിലേക്കുള്ള കുതിപ്പിന് തുടക്കമിട്ടത്. 

യുവ നിരയുമായിട്ടാണ് സാഫ് കപ്പില്‍ ഇന്ത്യ ഇറങ്ങുന്നത്. എതിരില്ലാത്ത രണ്ട് ഗോളുകള്‍ക്ക് ജയം പിടിക്കാനായെങ്കിലും നിരവധി അവസരങ്ങള്‍ മുതലാക്കാന്‍ ഇന്ത്യക്കായില്ല. ശ്രീലങ്കന്‍ ഗോള്‍ കീപ്പറുടെ മനസാന്നിധ്യമായിരുന്നു ഗോള്‍ മുഖത്തെ ഇന്ത്യന്‍ മുന്നേറ്റങ്ങളുടെ മുന ഒടിച്ചത്.

36ാം മിനിറ്റിലായിരുന്നു ഇന്ത്യയുടെ ആദ്യ ഗോള്‍ പിറന്നത്. 47ാം മിനിറ്റില്‍ ലാലിയന്‍സ്വാലയും വല കുലുക്കിയതോടെ ഇന്ത്യ ആധിപത്യം ഉറപ്പിക്കുകയായിരുന്നു. ഞായറാഴ്ച മാലീദ്വീപിനെതിരെയാണ് ഇന്ത്യയുടെ രണ്ടാമത്തെ ഗ്രൂപ്പ് ഘട്ട മത്സരം.