ചാങ്‌സു: മൂന്നാഴ്ചകള്‍ക്ക് മുന്‍പ് ലോക ചാമ്പ്യയായി ആത്മവിശ്വാസത്തോടെ ചൈന ഓപണ്‍ ബാഡ്മിന്റണ്‍ പോരാട്ടത്തിനിറങ്ങിയ ഇന്ത്യയുടെ പിവി സിന്ധുവിന് കനത്ത തിരിച്ചടി. രണ്ടാം റൗണ്ടില്‍ പരാജയപ്പെട്ട് സിന്ധു ടൂര്‍ണമെന്റില്‍ നിന്ന് പുറത്തായി. ലോക അഞ്ചാം നമ്പര്‍ താരമായ സിന്ധുവിനെ 15ാം റാങ്കിലുള്ള തായ്‌ലന്‍ഡിന്റെ പോണ്‍പവീ ചോചുവാങാണ് അട്ടിമറിച്ചത്. 

ആദ്യ സെറ്റ് നേടിയ ശേഷമാണ് സിന്ധു അവിശ്വസനീയമാം വിധം തോല്‍വി വഴങ്ങിയത്. രണ്ട്, മൂന്ന് സെറ്റുകള്‍ വിജയിച്ചാണ് തായ്‌ലന്‍ഡ് താരം മൂന്നാം റൗണ്ടിലേക്ക് കടന്നത്. മൂന്നാം സെറ്റില്‍ പോരാട്ടം ഇഞ്ചോടിഞ്ചായിരുന്നു. എന്നാല്‍ അന്തിമ വിജയം ചോചുവാങിനെ തുണച്ചു. സ്‌കോര്‍: 21-12, 13-21, 19-21. 58 മിനുട്ടുകളാണ് മത്സരം നീണ്ടത്. 

നേരത്തെ സൈന നേഹ്‌വാള്‍ ആദ്യ റൗണ്ടില്‍ തന്നെ പരാജയപ്പെട്ടിരുന്നു. പുരുഷ വിഭാഗത്തില്‍ പി കശ്യപും പുറത്തേക്കുള്ള വഴി കണ്ടു. 

അതേസമയം ഇന്ത്യയുടെ പ്രതീക്ഷയായി സായ് പ്രണീത് വിജയം സ്വന്തമാക്കി. ചൈനയുടെ ലു ഗ്വങ് സുവിനെ പരാജയപ്പെടുത്തിയാണ് സായിയുടെ മുന്നേറ്റം. സ്‌കോര്‍: 21-19, 21-19. രണ്ട് സെറ്റിലും ചൈനീസ് താരം കനത്ത വെല്ലുവിളി തീര്‍ത്തെങ്കിലും അന്തിമ വിജയം സായിക്കൊപ്പം നിന്നു.