റാഞ്ചി: വീണ്ടും സ്വര്‍ണ തിളക്കവുമായി പി യു ചിത്ര. ദേശീയ ഓപ്പണ്‍ അത്‌ലറ്റിത് മീറ്റില്‍ വനിതകളുടെ 1500 മീറ്ററിലാണ് ചിത്ര സ്വര്‍ണത്തിലേക്ക് ഓടിയെത്തിയത്. 

സ്വര്‍ണത്തിലേക്കുള്ള കുതിപ്പില്‍ ചിത്രയ്ക്ക് വേണ്ടി വന്ന സമയം 4 മിനിറ്റും 17.39 സെക്കന്റും. ലോക അത്‌ലറ്റിക് ചാമ്പ്യന്‍ഷിപ്പില്‍ തന്റെ ഇഷ്ട ഇനമായ 1500 മീറ്ററില്‍ ചിത്ര പോരിനിറങ്ങി എങ്കിലും ആദ്യ റൗണ്ട് പിന്നിടാന്‍ സാധിച്ചിരുന്നില്ല. ഈ തിരിച്ചടിക്ക് തൊട്ടുപിന്നാലെയാണ് ചിത്ര ദേശിയ ഓപ്പണ്‍ അത്‌ലറ്റിക് മീറ്റില്‍ സ്വര്‍ണം നേടി തന്റെ തിരിച്ചു വരവിനുള്ള ശ്രമങ്ങള്‍ ആരംഭിക്കുന്നത്. 

റാഞ്ചിയില്‍ ജിന്‍സണ്‍ ജോണ്‍സനും സ്വര്‍ണ മെഡല്‍ പ്രതീക്ഷ ആയിരുന്നെങ്കിലും രണ്ടാം സ്ഥാനത്തേക്ക് പിന്തള്ളപ്പെട്ടു. അജയ് കുമാര്‍ സരോജിനാണ് ഈ ഇനത്തില്‍ സ്വര്‍ണം. വനിതകളുടെ 100 മീറ്ററില്‍ വേഗമേറിയ താരമായി ദ്യുതി ചന്ദ് റെക്കോര്‍ഡും തന്റെ പേരില്‍ തീര്‍ത്തിരുന്നു.

11.22 സെക്കന്റിലാണ് ദ്യുതി വേഗമേറിയ താരമായത്. 11.26ന്റെ റെക്കോര്‍ഡ് ആണ് ദ്യുതി ഇവിടെ തിരുത്തി കുറിച്ചത്. ഈ നേട്ടത്തോടെ ഒളിംപിക്‌സിന് യോഗ്യത നേടുന്നതിന്റെ അടുത്തെത്താനും ദ്യുതിക്കായി. 11.15 സെക്കന്റാണ് ഒളിംപിക്‌സ് യോഗ്യത നേടുന്നതിന് വേണ്ടത്.