ടീമുകളില്‍ പലരും രണ്ടാം മത്സരവും പിന്നിട്ട് നില്‍ക്കുമ്പോള്‍ ഇന്ത്യ നാളെ ലോകകപ്പിലെ ആദ്യ മത്സരത്തിന് ഇറങ്ങും. രണ്ട് മത്സരം തോറ്റ് നില്‍ക്കുന്ന സൗത്ത് ആഫ്രിക്ക തിരിച്ചു വരവിന് ശ്രമിച്ചാല്‍ ഇന്ത്യയ്ക്ക് മത്സരം കടുത്തതാവും. എങ്കിലും പരിക്കില്‍ വലയുന്ന സൗത്ത് ആഫ്രിക്കയേക്കാള്‍ സാധ്യത ഇന്ത്യയ്ക്ക് തന്നെയാണ്. ഇന്ത്യയ്ക്ക് തന്നെയാണ് സാധ്യത എന്നിപ്പോള്‍ ദൈവവും പറഞ്ഞു കഴിഞ്ഞു...

ട്വിറ്ററിലെ ദൈവമാണ് ഇന്ത്യയ്‌ക്കൊപ്പം നില്‍ക്കുന്നത്. ആരാധകരെ കൗതുകത്തിലാക്കിയാണ് ട്വിറ്ററിലെ ഗോഡ് എന്ന അക്കൗണ്ടില്‍ നിന്നും ഇന്ത്യയെ പിന്തുണച്ച് ട്വീറ്റ് എത്തിയത്. എന്തുകൊണ്ട് ഇന്ത്യയ്ക്ക് മേല്‍ക്കൈ ലഭിക്കുന്നു എന്നത് ദൈവം വിശദീകരിക്കുകയും ചെയ്യുന്നു. ദൈവത്തിന്റെ ട്വീറ്റ് ട്വിറ്ററിലെ പ്രചകള്‍ വൈറലാക്കുകയും ചെയ്തിട്ടുണ്ട്. 

ജാദവ് പ്ലേയിങ് ഇലവനിലേക്ക് തിരികെ എത്തുകയും, പേസര്‍മാര്‍ക്ക് കുരുക്കായി രാഹുല്‍ നാലാം സ്ഥാനത്ത് ഇറങ്ങുകയും ചെയ്യുമെന്നാണ് എനിക്ക് തോന്നുന്നത്. തളര്‍ന്നതും, പരിക്കില്‍ വലയുന്നതുമായ സൗത്ത് ആഫ്രിക്കന്‍ ടീമിന് മേല്‍ ഫ്രഷായി ഇറങ്ങുന്ന ഇന്ത്യ അധിപത്യം പുലര്‍ത്തും. ആറാം ബൗളര്‍ എന്ന ഓപ്ഷന്‍ ഇല്ലെങ്കിലും ഇന്ത്യ തന്നെ ആധിപത്യം പുലര്‍ത്തുമെന്നും ട്വീറ്റില്‍ പറയുന്നു. 

ദൈവം ക്രിക്കറ്റ് ഫാന്‍ ആണ്. മറ്റ് കായിക മേഖലയിലെ താരങ്ങള്‍ ഇനി പ്രാര്‍ഥിച്ചിട്ട് കാര്യമില്ല, ദൈവം ഇന്ത്യക്കാരനാണ്...ദൈവം സച്ചിന്‍ തെണ്ടുല്‍ക്കറല്ലേ എന്നെല്ലാമാണ് ദൈവത്തിന്റെ ട്വിറ്റ് റീട്വീറ്റ് ചെയ്ത് ആരാധകര്‍ പറയുന്നത്.