'ആയിരം പൂര്‍ണചന്ദ്രന്മാരെ കാണാനാവട്ടെ', പിറന്നാള്‍ ആഘോഷ വേളയിലെ ഈ വാചകത്തിന്റെ അര്‍ത്ഥമെന്ത്?, വയസ് എത്രയാണ്?

ആയിരം പൂര്‍ണചന്ദ്രന്മാരെ കാണാനാവട്ടെ എന്ന് പലരും പറയാറുണ്ട്. മഹാന്മാര്‍ പിറന്നാള്‍ ആഘോഷിക്കുമ്പോള്‍ ചിലപ്പോഴൊക്കെ ഈ പ്രയോഗം മാധ്യമങ്ങളിലും വരാറുണ്ട്. എന്നാല്‍ ഇത് പലര്‍ക്കും എത്ര വയസ്സിനെയാണ് പരാമര്‍ ശിക്കുന്നത് എന്ന് മനസ്സിലാവില്ല. പലരും 100 വയസ് എന്നും 90 വയസ് എന്നുമൊക്കെ തെറ്റിദ്ധരിക്കുകയാണ് പതിവ്.

'ചന്ദ്രന്‍ അസ്തമിക്കുമ്പോള്‍ സമയവും അസ്തമിക്കുന്നു' നമ്മുടെ പഞ്ചാംഗവിദ്യയുടെ ആഴത്തിലുള്ള ഈ ചിന്തയാണ് സഹസ്രപൗര്‍ണ്ണമി എന്ന വിസ്മയകരമായ ഗണിതസത്യത്തിന്റെ അടിസ്ഥാനം. സാധാരണയായി, ഒരു പൗര്‍ണ്ണമി ഏകദേശം 29.530 ദിവസങ്ങള്‍ക്കു ശേഷം ആവര്‍ത്തിക്കുന്നു. ഈ ചന്ദ്രചക്രം 1000 പ്രാവശ്യം പൂര്‍ത്തിയാകാന്‍ വേണ്ട സമയം ഏകദേശം 29530.6 ദിവസമാണ്. അഥവാ 83 വര്‍ഷം 4 മാസം ആണ്. അതായത്, മനുഷ്യ ജീവിതത്തില്‍ ഒരിക്കല്‍ മാത്രമേ ഈ അപൂര്‍വ്വമായ ഗണിതഘടന അനുഭവിക്കാനാവൂ.

മലയാളം പഞ്ചാംഗം അനുസരിച്ച് ഈ സമയത്ത് 1000 പൂര്‍ണ്ണചന്ദ്ര രാശികള്‍ പൂര്‍ത്തിയാകുന്നു. യഥാര്‍ത്ഥത്തില്‍ 83 വര്‍ഷം 4 മാസം എത്തുന്നതിനു മുമ്പേ തന്നെ 1030.7 പൗര്‍ണ്ണമികള്‍ സംഭവിച്ചിട്ടുണ്ടാകുമെങ്കിലും ആയിരം എന്ന സംഖ്യയാണ് പ്രധാനമായി കണക്കിലെടുക്കുന്നത്. അതുകൊണ്ടു തന്നെ ഈ ദിനം 'സഹസ്രപൗര്‍ണ്ണമി' എന്നു വിളിക്കുന്നു.

സഹസ്രപൗര്‍ണ്ണമി വെറും ഒരു ജ്യോതിശാസ്ത്ര- ഗണിത സത്യമായിരിക്കില്ല. അത് കാലത്തിന്റെ ചക്രത്തെ, മനുഷ്യജീവിതത്തിന്റെ ദൈര്‍ഘ്യത്തെ, പ്രകൃതിയുടെ ചലനാത്മകതയെ ഒരുമിച്ച് ബോധ്യപ്പെടുത്തുന്ന ദാര്‍ശനിക സന്ദേശവുമാണ്.

ചന്ദ്രന്‍ തന്റെ ആയിരം പൂര്‍ണ്ണാവസ്ഥകള്‍ പൂര്‍ത്തിയാക്കുമ്പോള്‍, ആ പ്രകാശത്തിന്റെ ശുദ്ധതയും അതിന്റെ ദാര്‍ശനികതയും നമ്മില്‍ ഉള്‍ക്കൊള്ളണം. ഈ ദിവസത്തില്‍ ധ്യാനം, പാരായണം, ദീപം തെളിയിക്കല്‍ എന്നിവ ആചാരപരമായി അനുഷ്ഠിക്കുന്നത് അതുകൊണ്ടുതന്നെയാണ്.