ന്യൂഡല്‍ഹി: പ്രമുഖ വാഹന നിര്‍മ്മാതാക്കളായ ഹ്യുണ്ടായിയുടെ ഏറ്റവും ജനകീയ മോഡലുകളില്‍ ഒന്നായ വെന്യുവിന്റെ രണ്ടാം തലമുറ മോഡല്‍ നവംബര്‍ നാലിന് വിപണിയില്‍ അവതരിപ്പിക്കും. ഇതിനു പിന്നാലെ, പുതുക്കിയ വെന്യു എന്‍ ലൈനിന്റെ അരങ്ങേറ്റവും ഉടന്‍ തന്നെ ഉണ്ടായേക്കാം.
പുതിയ ഫ്രണ്ട്, റിയര്‍ ബമ്പറുകള്‍, ലംബമായി അടുക്കിയിരിക്കുന്ന പ്രൊജക്ടര്‍ യൂണിറ്റുകളുള്ള സ്പ്ലിറ്റ് ഹെഡ്ലാമ്പ് ഡിസൈന്‍, ചതുരാകൃതിയിലുള്ള ഇന്‍സേര്‍ട്ടുകളുള്ള പുതിയ ഗ്രില്‍, പുതിയ അലോയ് ഡിസൈന്‍, പുതിയ എല്‍ഇഡി ടെയില്‍ ലൈറ്റുകള്‍, റൂഫ് റെയിലുകള്‍, സംയോജിത ഹൈ-മൗണ്ടഡ് സ്റ്റോപ്പ് ലൈറ്റുള്ള സ്പോയിലര്‍ എന്നിവയാണ് പുതിയ വെന്യൂവില്‍ വരുന്ന മാറ്റങ്ങള്‍. മുന്‍ പതിപ്പിനെ അപേക്ഷിച്ച് ഡിസൈനില്‍ നിരവധി മാറ്റങ്ങളുമായാണ് പുതിയ വെന്യു വിപണിയില്‍ എത്തുക.
ഡിജിറ്റല്‍ ആയിട്ടുള്ള ഇന്‍സ്ട്രുമെന്റ് ക്ലസ്റ്റര്‍, വലിയ ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, പുതിയ എസി വെന്റുകളുള്ള പുനര്‍നിര്‍മ്മിച്ച ഡാഷ്ബോര്‍ഡ്, വളരെയധികം പരിഷ്‌കരിച്ച സെന്റര്‍ കണ്‍സോള്‍, പുതിയ ത്രീ-സ്പോക്ക് സ്റ്റിയറിംഗ് വീല്‍, ഡാഷ്ബോര്‍ഡില്‍ ഘടിപ്പിച്ച സ്പീക്കര്‍, ഇലക്ട്രിക് സണ്‍റൂഫ്, ലെവല്‍ 2 ADAS എന്നിവയാണ് അകത്തളത്തിലെ വിശേഷങ്ങള്‍.
ഹ്യുണ്ടായി സാങ്കേതിക വിശദാംശങ്ങളൊന്നും സ്ഥിരീകരിച്ചിട്ടില്ലെങ്കിലും അഞ്ച് സ്പീഡ് മാനുവല്‍, ആറ് സ്പീഡ് മാനുവല്‍, ഏഴ് സ്പീഡ് ഡിസിടി ഗിയര്‍ബോക്സുകളുമായി ഇണക്കിചേര്‍ത്ത 1.2 ലിറ്റര്‍ എന്‍എ പെട്രോള്‍, 1.0 ലിറ്റര്‍ ടര്‍ബോ പെട്രോള്‍, 1.5 ലിറ്റര്‍ ഡീസല്‍ എന്‍ജിനുകളുമായി പുതിയ വെന്യു അണിനിരക്കുമെന്ന് പ്രതീക്ഷിക്കുന്നു. മാരുതി ബ്രെസ്സ, കിയ സോണെറ്റ്, തുടങ്ങിയവയ്‌ക്കെതിരെയാണ് പുതിയ മോഡല്‍ മത്സരിക്കുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
