155 സിസി, ഒന്നര ലക്ഷം രൂപ വില; യമഹയുടെ 'കരുത്തന്‍', എക്‌സ്എസ്ആര്‍155 വിപണിയില്‍

ന്യൂഡല്‍ഹി: പ്രമുഖ ഇരുചക്ര വാഹന നിര്‍മ്മാതാക്കളായ യമഹ പുതിയ ബൈക്ക് വിപണിയില്‍ ഇറക്കി. യമഹ എക്‌സ്എസ്ആര്‍155 എന്ന പേരിലുള്ള ബൈക്കിന് 1,49,990 രൂപയാണ് പ്രാരംഭവില (ഡല്‍ഹി എക്‌സ്‌ഷോറൂം). യമഹയുടെ ആധുനിക-റെട്രോ കുടുംബത്തിലെ ഏറ്റവും ഒതുക്കമുള്ള മോഡലാണിത്.

വൃത്താകൃതിയിലുള്ള എല്‍ഇഡി ഹെഡ്ലാമ്പ്, ടിയര്‍ഡ്രോപ്പ് ടാങ്ക്, ലളിതമായ എല്‍സിഡി കണ്‍സോള്‍ എന്നിവയാണ് ബൈക്കിന്റെ പ്രധാനപ്പെട്ട പ്രത്യേകതകള്‍. ദൈനംദിന ഉപയോഗത്തിന് ചേര്‍ന്ന ഈ മോഡല്‍, സ്‌റ്റൈലും ഹാര്‍ഡ് വെയറും ബാലന്‍സ് ചെയ്താണ് വിപണിയില്‍ അവതരിപ്പിച്ചത്.

വേരിയബിള്‍ വാല്‍വ് ആക്‌ച്വേഷനോടുകൂടിയ 155cc, ലിക്വിഡ്-കൂള്‍ഡ്, ഫോര്‍-വാല്‍വ് സിംഗിള്‍ എന്‍ജിനാണ് വാഹനത്തിന്റെ കരുത്ത്. അസിസ്റ്റ്-ആന്‍ഡ്-സ്ലിപ്പര്‍ ക്ലച്ചുള്ള ആറ്-സ്പീഡ് ഗിയര്‍ബോക്സുമായി ജോടിയാക്കിയ എന്‍ജിന്‍ 18.1bhp ഉം 14.2Nm ഉം പുറപ്പെടുവിക്കുന്നു. സിറ്റി ഡ്രൈവിന് യോജിച്ച തരത്തിലാണ് വാഹനം ഡിസൈന്‍ ചെയ്തിരിക്കുന്നത്. ഡ്യുവല്‍-ചാനല്‍ എബിഎസും ട്രാക്ഷന്‍ നിയന്ത്രണവും ബൈക്കിനുണ്ട്.

തലകീഴായ ഫ്രണ്ട് ഫോര്‍ക്കുകളും ലിങ്ക്ഡ്-ടൈപ്പ് മോണോഷോക്കുമാണ് മറ്റു പ്രത്യേകതകള്‍. പതിനേഴു ഇഞ്ച് വീല്‍ ബേസോടെ അവതരിപ്പിച്ച ഈ മോഡല്‍ മെറ്റാലിക് ഗ്രേ, വിവിഡ് റെഡ്, ഗ്രേയിഷ് ഗ്രീന്‍ മെറ്റാലിക്, മെറ്റാലിക് ബ്ലൂ, എന്നിങ്ങനെ നാല് പെയിന്റ് ഓപ്ഷനുകള്‍ വാഗ്ദാനം ചെയ്യുന്നു. വലിയ വലുപ്പവും ഭാരവും ഇല്ലാതെ റെട്രോ അപ്പീല്‍ ആഗ്രഹിക്കുന്ന റൈഡര്‍മാര്‍ക്ക് ചേര്‍ന്ന മോഡലാണിത്.