ന്യൂഡല്ഹി: ഒന്നര പതിറ്റാണ്ടിനിടെ കേരളത്തിന്റെ സമ്പദ് വ്യവസ്ഥ മൂന്നര മടങ്ങോളം വളര്ന്നുവെന്ന് റിസര്വ് ബാങ്ക് കണക്ക്. 2011-12ല് കേരളത്തിലെ മൊത്തം ആഭ്യന്തര ഉല്പ്പാദനം( ജിഎസ്ഡിപി) 3.64 ലക്ഷം കോടി രൂപയായിരുന്നു. 2024-25ല് 2011-12നെ അപേക്ഷിച്ച് മൂന്നര മടങ്ങ് വര്ധിച്ച് 12.49 ലക്ഷം കോടി രൂപയായി.
ഉല്പ്പന്നങ്ങളും സേവനങ്ങളും അടക്കം സംസ്ഥാനത്തെ മൊത്തം സാമ്പത്തിക പ്രവര്ത്തനങ്ങളുടെ ആകെ മൂല്യമാണ് ജിഎസ്ഡിപി. കഴിഞ്ഞ വര്ഷം ഇത് 11.35 ലക്ഷം കോടി രൂപയായിരുന്നു. കോവിഡ് ബാധിച്ച 2020-21ല് മാത്രമാണ് 14 വര്ഷത്തിനിടെ സമ്പദ് വ്യവസ്ഥയില് ഇടിവുണ്ടായത്. 2019-20ല് 8.31 ലക്ഷം കോടി രൂപയായിരുന്നത് 2020-21ല് 7.72 ലക്ഷം കോടിയായി കുറഞ്ഞു. എന്നാല് തൊട്ടടുത്ത വര്ഷം ഇത് 9.24 ലക്ഷം കോടിയായി ഉയര്ന്നു.
പ്രളയമടക്കമുള്ള പ്രകൃതി ദുരന്തങ്ങളെയും കോവിഡിനെയും കേരളം അതിജീവിച്ചുവെന്ന് വ്യക്തമാക്കുന്നതാണ് കണക്ക്. 2022-23ല് 10.39 ലക്ഷം കോടി രൂപയാണ് കേരളത്തിലെ മൊത്തം ആഭ്യന്തര ഉല്പ്പാദനം. 2020-21 ഒഴിച്ച് 2011-12 മുതല് ആഭ്യന്തര ഉല്പ്പാദനം പടിപടിയായി ഉയരുന്നതാണ് കണക്കുകളില് നിന്ന് വ്യക്തമാക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
