ആഗോള ഡിജിറ്റൽ ലോകത്തെ നിശ്ചലമാക്കി ഫേസ്ബുക്ക് ഔട്ടേജ്; ലോഗിൻ ചെയ്യാനാകാതെ ദശലക്ഷങ്ങൾ

ന്യൂഡൽഹി: ആഗോള സോഷ്യൽ മീഡിയ ഭീമനായ ഫേസ്ബുക്കിൽ ഞായറാഴ്ച പെട്ടെന്ന് വൻ തകരാർ. ലോഗിൻ ചെയ്യാനും ഫേസ്ബുക്കിന്റെ പ്രധാന ഫീച്ചറുകൾ ഉപയോഗിക്കാനും സാധിക്കാതെ ലോകമെമ്പാടുമുള്ള ദശലക്ഷക്കണക്കിന് ഉപയോക്താക്കൾ പ്രതിസന്ധിയിലായി. ആഗോള ഔട്ടേജ് ട്രാക്കിംഗ് പ്ലാറ്റ്‌ഫോമായ ഡൗൺഡിറ്റെക്ടർ ആണ് ഫേസ്ബുക്ക് പ്രവർത്തനരഹിതമായ വിവരം പുറത്തുവിട്ടത്.

ഡെസ്ക്ടോപ്പ് വേർഷൻ വഴി ഫേസ്ബുക്ക് ലോഗിൻ ചെയ്യാൻ ശ്രമിച്ച ഭൂരിഭാഗം പേർക്കും "Account Temporarily Unavailable. Your account is currently unavailable due to a site issue. We expect this to be resolved shortly. Please try again in a few minutes" (സൈറ്റിലെ തകരാർ മൂലം നിങ്ങളുടെ അക്കൗണ്ട് താൽക്കാലികമായി ലഭ്യമല്ല. ഇത് ഉടൻ പരിഹരിക്കപ്പെടും, ദയവായി കുറച്ച് മിനിറ്റുകൾക്ക് ശേഷം വീണ്ടും ശ്രമിക്കുക) എന്ന എറർ മെസ്സേജാണ് തുടർച്ചയായി കാണിച്ചത്. ചിലർക്ക് വെബ്‌സൈറ്റ് ലോഡ് ആകുകയോ പേജ് തുറക്കുകയോ പോലും ചെയ്തില്ല.

ഇന്ത്യ, യുണൈറ്റഡ് കിംഗ്ഡം , കാനഡ, തുർക്കിയെ തുടങ്ങിയ വിവിധ രാജ്യങ്ങളിൽ നിന്നുള്ള ഉപയോക്താക്കൾ ഒരേസമയം തകരാറുകൾ റിപ്പോർട്ട് ചെയ്തു. ഇത് ആഗോളതലത്തിലുള്ള വലിയൊരു സാങ്കേതിക തകരാറാണെന്നാണ് സൂചന നൽകുന്നത്. അതേസമയം, കമ്പ്യൂട്ടറുകളിലൂടെയും ലാപ്ടോപ്പുകളിലൂടെയും ഡെസ്ക്ടോപ്പ് വേർഷൻ ഉപയോഗിച്ചവർക്ക് കടുത്ത ലോഗിൻ പ്രശ്നങ്ങൾ നേരിട്ടപ്പോൾ, സ്മാർട്ട്‌ഫോണുകളിലെ ഫേസ്ബുക്ക് മൊബൈൽ ആപ്ലിക്കേഷൻ ചില ഉപയോക്താക്കൾക്ക് സാധാരണ രീതിയിൽ പ്രവർത്തിക്കുന്നുണ്ട്. സർവീസിലെ ചില പ്രത്യേക പതിപ്പുകളെയോ ആക്സസ് പോയിന്റുകളെയോ മാത്രമാണ് ഈ സാങ്കേതിക പ്രശ്നം ബാധിച്ചതെന്നാണ് ഇത് വ്യക്തമാക്കുന്നത്.