കൊച്ചി: സംസ്ഥാനത്ത് റെക്കോര്ഡുകള് ഭേദിച്ചുള്ള സ്വര്ണവിലയുടെ കുതിപ്പ് തുടരുന്നു. ഇന്ന് പവന് 760 രൂപ വര്ധിച്ചതോടെ പുതിയ ഉയരം കുറിച്ചിരിക്കുകയാണ് സ്വര്ണവില. 1,08,000 രൂപയാണ് ഒരു പവന് സ്വര്ണത്തിന്റെ വില. ഗ്രാമിന് 95 രൂപയാണ് വര്ധിച്ചത്. 13,500 രൂപയാണ് ഒരു ഗ്രാം സ്വര്ണത്തിന്റെ വില.
ഇന്നലെ രണ്ടു തവണകളായി 1800 രൂപയാണ് വര്ധിച്ചത്. തിങ്കളാഴ്ച രാവിലെ 1400 രൂപ വര്ധിച്ചതോടെ സര്വകാല റെക്കോര്ഡിട്ട സ്വര്ണവില റെക്കോര്ഡുകള് തിരുത്തി കുതിക്കുന്ന കാഴ്ചയാണ് കണ്ടത്. 14ന് രേഖപ്പെടുത്തിയ 1,05,600 എന്ന റെക്കോര്ഡ് ആണ് ഇന്നലെ തിരുത്തിയത്.
ഡിസംബര് 23നാണ് സ്വര്ണവില ആദ്യമായി ഒരു ലക്ഷം കടന്നത്. അന്താരാഷ്ട്ര വിപണിയിലെ മാറ്റങ്ങളാണ് കേരളത്തിലെ സ്വര്ണ വിലയെ സ്വാധീനിക്കുന്നത്. സുരക്ഷിത നിക്ഷേപം എന്ന നിലയില് സ്വര്ണത്തിലേക്ക് കൂടുതല് ആളുകള് എത്തിയതാണ് വില ഇപ്പോഴും ഉയര്ന്നുനില്ക്കാന് കാരണം.
വെള്ളി വിലയും പുതിയ ഉയരത്തിലാണ്. ഇന്ന് കിലോഗ്രാമിന് 12,000 രൂപയാണ് വര്ധിച്ചത്. 3,30,000 രൂപയാണ് ഒരു കിലോ വെള്ളിയുടെ വില. ഗ്രാമിന് 12 രൂപ വര്ധിച്ച് 330 രൂപയായി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
