ന്യൂയോര്‍ക്ക്: റെക്കോര്‍ഡ് നേട്ടം കുറിച്ച് കാലിഫോര്‍ണിയ ആസ്ഥാനമായി പ്രവര്‍ത്തിക്കുന്ന പ്രമുഖ ചിപ്പ് നിര്‍മ്മാതാക്കളായ എന്‍വിഡിയ. ലോക ചരിത്രത്തില്‍ ആദ്യമായി വിപണി മൂല്യം നാലു ലക്ഷം കോടി ഡോളര്‍ മറികടന്ന ഏക കമ്പനി എന്ന ചരിത്ര നേട്ടമാണ് എന്‍വിഡിയ സ്വന്തമാക്കിയത്. കമ്പനിയുടെ ഓഹരിവില ഇന്നലെ 2.5 ശതമാനം ഉയര്‍ന്നതോടെയാണ് വിപണിമൂല്യത്തില്‍ നിര്‍ണായക നാഴികക്കല്ല് പിന്നിട്ടത്.
കഴിഞ്ഞ വര്‍ഷം ജൂണിലാണ് വിപണി മൂല്യം മൂന്ന് ലക്ഷം കോടി ഡോളര്‍ കടന്നത്. വെറും 13 മാസം കൊണ്ടാണ് വിപണി മൂല്യത്തില്‍ വീണ്ടും ഒരു ലക്ഷം കോടി ഡോളര്‍ കൂടി ചേര്‍ത്ത് കമ്പനി പുതിയ ഉയരം കുറിച്ചത്. മിക്ക ആഗോള രാജ്യങ്ങളുടെയും മൊത്ത ആഭ്യന്തര ഉല്‍പ്പാദനത്തേക്കാള്‍ മുകളിലാണ് കമ്പനിയുടെ വിപണി മൂല്യം. എന്‍വിഡിയ ഒരു രാജ്യമായിരുന്നെങ്കില്‍ ജിഡിപിയുടെ അടിസ്ഥാനത്തില്‍ യുഎസ്, ചൈന, ജര്‍മ്മനി, ജപ്പാന്‍ എന്നിവയ്ക്ക് പിന്നില്‍ അഞ്ചാം സ്ഥാനത്ത് കമ്പനി ഉണ്ടാവുമായിരുന്നു. കമ്പനിയുടെ വിപണി മൂല്യം ഇന്ത്യന്‍ സമ്പദ്വ്യവസ്ഥയേക്കാള്‍ അല്‍പ്പം മുകളിലാണ്. 2022ല്‍ ചാറ്റ്ജിപിടിയുടെ വരവോടെ രാജ്യാന്തരതലത്തില്‍ നിര്‍മിതബുദ്ധി (എഐ) അധിഷ്ഠിത ചിപ്പുകള്‍ ഉള്‍പ്പെടെയുള്ള ഹാര്‍ഡ്‌വെയറുകള്‍ക്ക് ഡിമാന്‍ഡ് ഏറിയതും ഈ രംഗത്ത് നേരിട്ടുള്ള എതിരാളികള്‍ ഇല്ലാതിരുന്നതുമാണ് എന്‍വിഡിയയ്ക്ക് കരുത്തായത്.
ലോകത്ത് വിപണി മൂല്യം ആദ്യമായി മൂന്നു ലക്ഷം കോടി ഡോളര്‍ കടന്ന കമ്പനികള്‍ ആപ്പിളും മൈക്രോസോഫ്റ്റുമാണ്. എന്നാല്‍, ഇവയെ നിഷ്പ്രഭമാക്കി മുന്നേറുകയാണ് എന്‍വിഡിയ. 2023 ജൂണിലാണ് കമ്പനിയുടെ വിപണിമൂല്യം ആദ്യമായി ഒരു ലക്ഷം കോടി ഡോളര്‍ ഭേദിച്ചത്. 2024 ഫെബ്രുവരിയില്‍ രണ്ടു ലക്ഷം കോടി ഡോളറും ജൂണില്‍ മൂന്ന് ലക്ഷം കോടി ഡോളറും മറികടന്ന് കുതിക്കുന്നതാണ് പിന്നീട് കണ്ടത്.
3.74 ലക്ഷം കോടി ഡോളറുമായി മൈക്രോസോഫ്റ്റാണ് നിലവില്‍ രണ്ടാംസ്ഥാനത്ത്. ആപ്പിള്‍ (3.15 ലക്ഷം കോടി ഡോളര്‍), ആമസോണ്‍ (2.36 ലക്ഷം കോടി ഡോളര്‍), എന്നിവ യഥാക്രമം തൊട്ടടുത്ത സ്ഥാനങ്ങളില്‍ വരും. വിപണി മൂല്യത്തിന്റെ അടിസ്ഥാനത്തില്‍ പരിശോധിച്ചാല്‍ എന്‍വിഡിയ 30 എച്ച്ഡിഎഫ്‌സി ബാങ്കുകള്‍ക്കും 37 ടിസിഎസിനും 22 റിലയന്‍സ് ഇന്‍ഡസ്ട്രീസിനും തുല്യമാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
