ജനങ്ങളുടെ സമ്പാദ്യശീലം വളര്ത്തുന്നതിന് നിരവധി ലഘുസമ്പാദ്യ പദ്ധതികള് കേന്ദ്രസര്ക്കാര് ആവിഷ്കരിച്ചിട്ടുണ്ട്. അതില് ഒന്നാണ് കിസാന് വികാസ് പത്ര. കിസാന് വികാസ് പത്രയില് നിക്ഷേപിക്കുന്നവര്ക്ക് 115 മാസം ( ഒന്പത് വര്ഷവും ഏഴു മാസവും) കഴിയുമ്പോള് ഇരട്ടി തുക ലഭിക്കുമെന്നതാണ് പ്രത്യേകത. കൂട്ടുപലിശയാണ് കണക്കാക്കുന്നത് എന്നതാണ് മെച്ചപ്പെട്ട റിട്ടേണ് ലഭിക്കാന് സഹായിക്കുന്നത്.
നിലവില് 7.5 ശതമാനമാണ് പദ്ധതിയുടെ വാര്ഷിക കൂട്ടുപലിശ. ലഘു സമ്പാദ്യ പദ്ധതികളുടെ പലിശനിരക്ക് മൂന്നുമാസം കൂടുമ്പോള് കേന്ദ്രസര്ക്കാര് നിര്ണയിക്കാറുണ്ട്. സര്ക്കാരിന്റെ പിന്തുണ ഉള്ളത് കൊണ്ട് സുരക്ഷിതമായ നിക്ഷേപ പദ്ധതിയാണിത്.
കിസാന് വികാസ് പത്രയില് ആയിരം രൂപയാണ് കുറഞ്ഞ നിക്ഷേപം. തുടര്ന്ന് നൂറ് രൂപയുടെ ഗുണിതങ്ങളായി കൂടുതല് നിക്ഷേപിക്കാനും അവസരമുണ്ട്. പരിധിയില്ലാതെ എത്ര വേണമെങ്കിലും പദ്ധതിയില് നിക്ഷേപിക്കാവുന്നതാണ്. റിസ്ക് എടുക്കാന് താല്പ്പര്യമില്ലാത്തവര്ക്ക് ഗ്യാരണ്ടി റിട്ടേണ് നല്കുന്നതാണ് പദ്ധതി. പത്തുലക്ഷത്തിന് മുകളിലുള്ള നിക്ഷേപത്തിന് സ്രോതസ് വെളിപ്പെടുത്തേണ്ടതാണ്.
നിലവിലെ പലിശനിരക്ക് അനുസരിച്ച് അഞ്ചുലക്ഷം രൂപയാണ് നിക്ഷേപിക്കുന്നതെങ്കില് കാലാവധി തീരുമ്പോള് പത്തുലക്ഷം രൂപ ലഭിക്കും. 50 ലക്ഷം രൂപയാണ് നിക്ഷേപിക്കുന്നതെങ്കില് പത്തുവര്ഷം കഴിയുമ്പോള് ഒരു കോടി രൂപ ലഭിക്കാനും ഈ പദ്ധതി സഹായകമാണ്. നികുതി ഇളവിന് ഈ പ്ലാന് ഉപയോഗിക്കാന് സാധിക്കില്ല. പദ്ധതിയുടെ കാലാവധി തീരുന്നതിന് മുന്പ് അക്കൗണ്ട് ഉടമ മരിച്ചുപോകുന്നത് അടക്കം ചില സാഹചര്യങ്ങളില് ഇടയ്ക്ക് വച്ച് തുക പിന്വലിക്കാനും അനുവദിക്കും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
