മുംബൈ: ബാങ്കുകളില് അനാഥമായിക്കിടക്കുന്ന നിക്ഷേപങ്ങള് എത്രയുംവേഗം ഉടമകള്ക്കോ അവകാശികള്ക്കോ തിരികെ നല്കണമെന്ന് റിസര്വ് ബാങ്ക് നിര്ദേശം. മൂന്നുമാസംകൊണ്ട് നിക്ഷേപങ്ങള് പരമാവധിപേര്ക്ക് മടക്കിനല്കാന് ശ്രമിക്കണമെന്നാണ് റിസര്വ് ബാങ്ക് ബാങ്കുകളോട് നിര്ദേശിച്ചിരിക്കുന്നത്.
രാജ്യത്തെ ബാങ്കുകളില് പത്തുവര്ഷമായി ഉപയോഗിക്കാതെ കിടക്കുന്ന സേവിങ്സ്, കറന്റ് അക്കൗണ്ടുകളിലെ തുക, കാലാവധി കഴിഞ്ഞിട്ടും പത്തുവര്ഷമായി പിന്വലിക്കാതെ കിടക്കുന്ന സ്ഥിരനിക്ഷേപങ്ങള് എന്നിവയാണ് അവകാശികളില്ലാതെ കിടക്കുന്ന നിക്ഷേപമായി കണക്കാക്കുന്നത്. ഈ തുക ബാങ്കുകള് റിസര്വ് ബാങ്കിന്റെ നിക്ഷേപക ബോധവത്കരണ ഫണ്ടിലേക്കു മാറ്റുകയാണ് പതിവ്. എങ്കിലും നിക്ഷേപകര് അവകാശമുന്നയിച്ച് എത്തിയാല് ഈ തുക പലിശസഹിതം മടക്കിനല്കും.
അടുത്തിടെനടന്ന സാമ്പത്തിക സുസ്ഥിരത-വികസന കൗണ്സില് യോഗത്തോടനുബന്ധിച്ച് ബാങ്കുകള്ക്കു നല്കിയ അറിയിപ്പിലാണ് ഇത്തരമൊരു നിര്ദേശം ആര്ബിഐ മുന്നോട്ടുവെച്ചിരിക്കുന്നത്. ഇതിനായി ജില്ലാ അടിസ്ഥാനത്തില് ബാങ്കുകളുടെ സംയുക്ത ക്യാമ്പുകള് സംഘടിപ്പിക്കാനും നിര്ദേശിച്ചിട്ടുണ്ട്. അവകാശികളില്ലാതെ കിടക്കുന്ന നിക്ഷേപങ്ങളുടെ പട്ടിക ജില്ലാ അടിസ്ഥാനത്തില് തയ്യാറാക്കിയാകും ക്യാംപ് സംഘടിപ്പിക്കുക. ഒക്ടോബര് ആദ്യം ഗുജറാത്തിലായിരിക്കും ആദ്യ ക്യാംപ്. ഡിസംബര്വരെ പലയിടത്തായി ഇത്തരം ക്യാംപുകള് സംഘടിപ്പിക്കും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
